2025-yil 20–21-iyun kunlari Samarqand shahrida oliy ta’lim muassasalari bitiruvchi talabalari uchun “TalabaEKSPO – 2025” kasb ko‘rgazmasi bo‘lib o‘tmoqda.

Ushbu tadbir “Kelajakka qadam” dasturi va “Dolzarb 90 kun” loyihasi doirasida Oliy ta’lim, fan va innovatsiyalar vazirligi, “O‘zmilliybank” AJ, Savdo-sanoat palatasi hamda Samarqand viloyati hokimligi hamkorligida tashkil etilmoqda. Maqsad — bitiruvchi yoshlarning bandligiga ko‘maklashish, ularni ish beruvchilar bilan to‘g‘ridan to‘g‘ri muloqotga kirishishlari uchun platforma yaratishdir.

Ko‘rgazmada mamlakatimizning turli hududlaridan kelgan 300 ga yaqin yirik korxonalar, tijorat banklari va tashkilotlar, shuningdek, 20 ming nafardan ziyod talabalar ishtirok etmoqda.

Mazkur muhim tadbirda Jizzax davlat pedagogika universitetidan Samarqandlik 124 nafar bitiruvchi talabalar ham faol ishtirok etmoqda. Ular ko‘rgazma doirasida o‘z mutaxassislik yo‘nalishlariga mos ish takliflari, shartnoma asosida amaliyot o‘tash imkoniyatlari hamda turli kasbiy maslahatlardan foydalanishmoqda.

“TalabaEKSPO – 2025” — bitiruvchi yoshlar uchun kelajakka ishonch bilan qadam tashlash, mehnat bozorida o‘z o‘rnini topish va malakali kadr sifatida yetishib chiqishda muhim ahamiyat kasb etadi.