Joriy yilning 15–18 dekabr kunlari Toshkent shahrida o‘tkazilgan intellektual olimpiadada universitetning “Zakovat” jamoasi muvaffaqiyatli ishtirok etib, respublika miqyosida munosib natijani qayd etdi.
Shu munosabat bilan universitet rektori Maksudjan Yuldashev “Zakovat” jamoasi a’zolari va murabbiylari bilan uchrashuv o‘tkazdi. Uchrashuv davomida shashka bo‘yicha o‘g‘il bolalar jamoasining respublika miqyosida 2-o‘rinni egallagani, “Breyn-ring” bahslarida esa kuchli jamoalarni mag‘lub etib, chorak finalgacha yetib borilgani alohida e’tirof etildi.
Muloqotda 2026 yildan boshlab universitet miqyosida mavsumiy intellektual o‘yinlarga start berilishi ma’lum qilindi. Bu tashabbus talabalarning intellektual salohiyatini oshirish, ularni ilmiy va mantiqiy fikrlashga keng jalb etish maqsadida tashkil etilishi ta’kidlandi.
Shuningdek, universitet rektori jamoa murabbiyi va “Zakovat” jamoasi a’zolariga erishilgan natijalar uchun minnatdorchilik bildirib, kelgusida yanada yuqori marralarni zabt etishga ishonch bildirdi.
