Jizzax davlat pedagogika universitetida professor-o‘qituvchilar va xodimlarning bo‘sh vaqtini mazmunli tashkil etish, ularning ijodiy va ruhiy tiklanishiga ko‘maklashish maqsadida yo‘lga qo‘yilgan sayohatlar o‘z samarasini bermoqda.

22–23-noyabr kunlari navbatdagi sayohat doirasida universitetning bir guruh professor-o‘qituvchilari Zomin tog‘lari, qorli manzarasi va musaffo havosidan bahramand bo‘lib qaytishdi. Tabiatning qishki go‘zalligi, sokinlik va tog‘ muhitining tinchligi ishtirokchilarga haqiqiy hordiq bo‘ldi.

E’tiborlisi, joriy yilning sentyabr oyidan beri har hafta — shanba va yakshanba kunlari tashkil etilayotgan mazkur sayohatlar orqali 300 dan ortiq professor-o‘qituvchi va ishchi-xodimlar turli yo‘nalishlarda dam olish imkoniyatiga ega bo‘ldilar.

Universitet rahbariyati tashabbusi va kasaba uyushmasi qo‘mitasi ko‘magida har hafta shanba-yakshanba kunlari amalga oshirilayotgan ushbu loyiha jamoa a’zolarining birdamligini kuchaytirish, ularning ish unumdorligini oshirish hamda sog‘lom turmush tarzini qo‘llab-quvvatlashga xizmat qilmoqda.