Vazirlar Mahkamasining 2025-yil 10-martdagi tegishli qarori oliy ta’lim tizimini yanada takomillashtirish, grantlarni adolatli va samarali taqsimlash hamda yoshlarga teng imkoniyatlar yaratishda muhim huquqiy asos bo‘lib xizmat qiladi. Mazkur qaror doirasida iqtidorli talabalarni aniqlash, ularni rag‘batlantirish, talabalar o‘rtasida raqobat muhitini yaratish mexanizmi takomillashtirilib, yuqori malakali mutaxassislarni tayyorlash jarayoni yanada rivojlantirilmoqda.
Qarorga ko‘ra, oliygohlarda davlat granti kvotalarini tabaqalashtirilgan tarzda qayta taqsimlash amaliyoti joriy etildi. Endilikda ikkinchi va undan yuqori kurslarda tahsil olayotgan, o‘zlashtirish ko‘rsatkichi yuqori bo‘lgan ijtimoiy faol talabalarga ta’lim granti to‘liq va to‘liq bo‘lmagan shakllarda taqdim etiladi.
Shuningdek, mazkur hujjatga asosan, Ijtimoiy himoya milliy agentligi hamda Oliy ta’lim, fan va innovatsiyalar vazirligi tomonidan belgilangan ayrim toifadagi talabalarga qo‘shimcha imkoniyatlar yaratildi. Ushbu toifadagi talabalar o‘zlashtirish ko‘rsatkichiga qarab ikki turdagi grantdan foydalanishi mumkin. Birinchi turdagi grant orqali ularning kontrakt to‘lovi Davlat byudjetidan to‘liq qoplanadi, ikkinchi turdagi grantda esa moliyaviy mustaqil oliygohlarning mablag‘lari hisobidan kontrakt summasining ma’lum bir qismi qoplab beriladi.
Bundan tashqari, ushbu toifadagi abituriyentlar uchun davlat granti kvotasidan tashqari 10 foizgacha qo‘shimcha grantlar ajratiladi. Davlat grantiga o‘tish balining 80 foizidan yuqori natija ko‘rsatgan abituriyentlar ushbu grantlar orqali o‘qishga kirish imkoniyatiga ega bo‘ladi.
Talabalar uchun yana bir muhim yangilik – o‘zlashtirish ko‘rsatkichi 3,5 va undan yuqori bo‘lgan ayrim toifadagi talabalarga keyingi o‘quv yili uchun foizsiz ta’lim krediti ajratiladi. Bu imkoniyat orqali yoshlarimiz ta’lim olish jarayonida moliyaviy qiyinchiliklarga duch kelmaydi. Grantlarni taqdim etish jarayoni shaffoflik va xolislik tamoyillariga asoslanadi. Barcha talabgorlar oliygohlarning rasmiy veb-sayti orqali onlayn tarzda ariza topshirishi mumkin.
Grantlarga talabgorlar oliygohlar huzurida tashkil etiladigan maxsus komissiyalar tomonidan baholanib, natijalar yangi o‘quv yili boshlanishidan oldin e’lon qilinadi.
