Jizzax davlat pedagogika universitetida “Mirzo Ulug‘bek vorislari” respublika ko‘rik-tanlovining Jizzax viloyati bosqichi bo‘lib o‘tdi. Unda tanlovning quyi bosqichlarida g‘oliblikni qo‘lga kiritgan 58 nafar o‘g‘il-qiz o‘zaro bahslashdi.
Vazirlar Mahkamasining o‘tgan yil 18 yanvardagi “Iste’dodli yoshlarni qo‘llab-quvvatlash “Ulug‘bek” jamg‘armasi faoliyatini rivojlantirish chora-tadbirlari to‘g‘risida” gi qaroriga asosan tashkil etilgan tanlovning tuman, shahar bosqichlari fevral-mart oylarida o‘tkazildi, –Viloyat bosqichini aprel va mamlakat bosqichini may oyida o‘tkazish belgilangan. Ko‘rik-tanlovning tuman, shahar bosqichining besh nafar g‘olibi bazaviy hisoblash miqdorining besh, viloyat bosqichida g‘olib chiqqan besh nafar ishtirokchi o‘n va respublika bosqichida g‘oliblikni qo‘lga kiritgan 100 nafar qatnashchi 20 baravar miqdorida pul mukofoti bilan taqdirlanadi.
Viloyatda joriy yilgi ko‘rik-tanlovda 1000 dan ziyod yoshlar qatnashish istagini bildirgan. Ularning quyi sinovlardan muvaffaqiyatli o‘tganlar tuman va shahar bosqichlarida o‘z intellektual salohiyatini namoyon etdi. Viloyatd a o‘tkazilgan tanlovda Baholash komissiyasi xulosasiga ko‘ra, 16-19-yosh doirasida 8 nafar o’quvchi yoshlar, 20-25-yosh doirasida esa 12 nafar talaba yoshlar g’olib deb topildi va respublika bosqichida ishtirok etish uchun yo’llanmani qo’lga kiritdi.
Yakunda eng yaxshi ixtiro, g‘oya va ishlanmalari taqdimotini o‘tkazgan 20 nafar yigit-qiz mamlakat bosqichida qatnashish huquqini qo‘lga kiritib, maxsus sertifikat va qimmatbaho sovg‘alar bilan taqdirlandi.
