JDPUda o‘tkazilgan navbatdagi tadbirga universitet rektoriga biriktirilgan uyushmagan yoshlar, mahalla faollari, maktab o‘quvchilari hamda talaba yoshlar taklif etildi.

Universitet ijodkor yoshlari tomondan tashkil etilgan badiiy musiqiy kechada Vatanga muhabbat, sevgi-sadoqat, jasurlik, mehnatsevarlik, odamiylik haqida kuylandi. Musiqiy kechada so‘zga chiqqanlar yoshlarni bilim olishga, yurt taraqqiyoti uchun munosib kadrlar bo‘lib yetishishga chaqirishdi. Talabalar o‘zlarining sho‘x qo‘shiqlari va go‘zal raqslari., sahnaviy ko‘rinishlari bilan yig‘ilganlarni xushnud etishdi

– “Ma’rifat ulashib” loyihasi butun respublikamizda amalga oshirilyapti, – dedi universitetning yoshlar bilan ishlash, ma’naviyat va ma’rifat masalalari bo‘yicha birinchi prorektor S.Nazarqosimov – Ushbu loyiha asosida bugungi kungacha ham oliygohda “Zakovat” intellektual o‘yinlari, “Munozara” debat bellashuvlari, “Mushoira” va adiblarning hayotiga bag‘ishlangan tadbirlar o‘tkazdik. Shu kungacha talabalarimiz bir qancha taniqli adiblarimiz bilan uchrashdi. Bugungi tadbirga universitet rektoriga biriktirilgan uyushmagan yoshlar, mahalla faollari va aynan JDPUga biriktirilgan maktablarning o‘quvchi yoshlari ham taklif etilgan. Tadbir davomida faol yoshlarni taqdirlashga harakat qildik. Rejamizda bu kabi tanlov va tadbirlarni faqatgina shahar markazida emas, bizga biriktirilgan chekka hududlardagi maktablarda ham o‘tkazish, o‘ylaymanki, bu kabi tadbirlar olis qishloqlardagi iste’dodli yoshlarning kashf etilishiga xizmat qiladi.