Mazkur muzokarada Nepal davlatida faoliyat yurituvchi «Yatri Educational Consultancy» mas’uliyati cheklangan jamiyati raisi doktor Gayatri Prasad Sharma (Ashis) ishtirok etdi. Uchrashuv doirasida xorijiy abituriyentlarni saralash va qabul qilish mexanizmlari, ularning hujjatlarini rasmiylashtirish tartibi hamda ta’lim jarayoniga integratsiya qilish masalalari batafsil muhokama qilindi.
Shuningdek, tibbiyot yo‘nalishida ta’lim olayotgan xorijiy talabalar uchun o‘quv jarayonini xalqaro talablarga muvofiq tashkil etish, ingliz tilida dars olib boradigan yuqori malakali professor-o‘qituvchilarni jalb qilish, zamonaviy o‘quv-uslubiy ta’minotni takomillashtirish masalalariga alohida e’tibor qaratildi.
Tomonlar talabalarning ijtimoiy-maishiy sharoitlarini yaxshilash, jumladan, yotoqxona bilan ta’minlash, transport va moslashuv (adaptatsiya) jarayonlarini tizimli yo‘lga qo‘yish yuzasidan ham fikr almashdilar.
Uchrashuv yakunida o‘zaro manfaatli hamkorlikni yo‘lga qo‘yish, ta’lim sifatini oshirish va uni xalqaro standartlarga muvofiqlashtirish borasida aniq tashkiliy va amaliy qadamlarni belgilab olishga kelishib olindi.
