Jizzax Davlat Pedagogika Universitetida katta nufuz va qizg‘in qiziqish bilan kutilgan tarixiy monografiya — “Universitet sari odimlar” nomli 5 jildlik kitobning taqdimot marosimi bo‘lib o‘tdi. Tadbirga ta’lim muassasasida bir necha yillar faoliyat yuritgan faxriy ustozlar hamda ayni kunlarda ilmiy-pedagogik faoliyatini davom ettirayotgan professor-o‘qituvchilar taklif etildi..
Taqdimot marosimini universitet rektori Sh. Sharipov kirish so‘zi bilan ochib, ushbu tarixiy asarning yaratilishi, mazmun-mohiyati va universitetning yarim asrlik faoliyatiga bag‘ishlanganligi haqida fikrlarini bildirdi. Rektor so‘zlariga ko‘ra, “Universitet sari odimlar” nafaqat Jizzax Davlat Pedagogika Universitetining rivojlanishiga qiziquvchi kitobxonlar uchun, balki butun oliy ta’lim tizimidagi professor-o‘qituvchilar, tadqiqotchilar, talabalar hamda keng jamoatchilik uchun muhim ilmiy-ma’rifiy manba hisoblanadi.
Marosim davomida kitobning har bir jildi yaratilganida hissa qo‘shgan professor-o‘qituvchilar o‘z ma’ruzalari bilan ishtirok etdi. Ular ta’lim-tarbiya, fan va ma’rifat yo‘lida xizmat qilgan ustozlarning ilmiy-pedagogik faoliyati haqida so‘zlab berdi. Shuningdek, universitet tarixida alohida o‘rin tutishgan, jamiyatda keng e’tirof etilgan el ardoqli ziyolilarni yodga olishga alohida e’tibor qaratildi.
Tadbirning tantanali qismidan so‘ng mehmonlar universitet tuzilmasi qoshida tashkil etilgan “Qatag‘on qurbonlari xotirasi” hamda 50-yillik yubiley arafasida ochilgan “Universitet tarixi” muzeylariga tashrif buyurishdi. U yerda ular tarixiy fotosuratlar, qadimiy hujjatlar va qadriyatlar bilan bog‘liq qiziqarli eksponatlar bilan tanishdilar.
Tadbir so‘ngida, universitet kasaba uyushmasi tomonidan Qurbon hayiti bayrami munosabati bilan tashkil etilgan bir piyola choy ustida mehmonlar samimiy suhbat qurishdi. Ushbu damlar nafaqat ilmiy-tarixiy voqeani muhokama qilish, balki o‘zaro samimiylik va ma’naviy bog‘lanishlarni mustahkamlashga xizmat qiladi.
