Jizzax davlat pedagogika universitetida “Oliy ta’lim muassasalarida ta’lim sifatini samarali ta’minlashda nodavlat-notijorat tashkilotlarning o‘rni” mavzusida seminar-trening tashkil etildi.
Tadbirni universitetning yoshlar masalalari, ma’naviy-ma’rifiy ishlar bo‘yicha birinchi prorektori ochib berdi. Seminar Oliy ta’lim, fan va innovatsiyalar vazirligi huzuridagi Jamoatchilik kengashi hamda universitet Jamoatchilik kengashi hamkorligida o‘tkazildi.
Seminar «Jamoatchilik kengashi nima va uning vazifalari nimadan iborat?» degan savollarga javob berish bilan boshlandi. Seminar mehmoni — Oliy ta’lim, fan va innovatsiyalar vazirligi huzuridagi Jamoatchilik kengashi raisi Feruza Rashidova bo‘lib, u tadbirni noodatiy va interaktiv usulda olib bordi. Moderator ishtirokchilarni 7 ta guruhga ajratib, har bir guruh bilan alohida ish olib bordi.
Seminar davomida “Ta’lim — 2030” konsepsiyasi asosida jamoatchilik tashkilotlarining vazifalari, ma’naviy-ma’rifiy ishlarni samarali tashkil etishda ularning o‘rni, oliy ta’lim muassasalari va nodavlat-notijorat tashkilotlar o‘rtasidagi ijtimoiy hamkorlik masalalari muhokama qilindi.
Seminar yakunida universitet Jamoatchilik kengashi raisi A.Shamisiyev so‘zga chiqib, oliygohda bu borada amalga oshirilayotgan ishlar va erishilgan natijalar haqida to‘xtalib o‘tdi.
