Jizzax davlat pedagogika universiteti Ingliz tili nazariyasi va amaliyoti kafedrasi mudiri, dotsent Jabborova Anora O‘zbekiston Respublikasi Innovatsion rivojlanish agentligi tomonidan e’lon qilingan xalqaro ilmiy stajirovka tanlovida muvaffaqiyatli ishtirok etib, g‘oliblikni qo‘lga kiritdi.

Tanlov natijasida u hozirda Buyuk Britaniyaning yetakchi oliy ta’lim muassasalaridan biri — Portsmut universitetida ilmiy stajirovka o‘tamoqda. Mazkur stajirovka Innovatsion rivojlanish agentligi huzuridagi Ilm-fanni moliyalashtirish va innovatsiyalarni qo‘llab-quvvatlash jamg‘armasi tomonidan moliyalashtirilgan. Loyiha O‘zbekiston olimlari va tadqiqotchilarining ilmiy salohiyatini oshirish, xalqaro ilmiy hamkorlikni mustahkamlash, shuningdek, ilg‘or tajriba va innovatsion yondashuvlarni respublikamiz oliy ta’lim tizimiga joriy etishni maqsad qilgan.

Portsmut universitetidagi stajirovka davomida dotsent Jabborova xorijiy ilmiy tajriba, zamonaviy tadqiqot metodlari, ta’limda innovatsion yondashuvlar bilan yaqindan tanishmoqda. Shuningdek, u Buyuk Britaniyada ta’lim tizimining tashkil etilishi, ilmiy izlanishlarni rejalashtirish, hamda pedagogik innovatsiyalarni o‘quv jarayoniga integratsiya qilish bo‘yicha chuqur amaliy ko‘nikmalarni egallamoqda.

Ushbu stajirovka nafaqat professor-o‘qituvchining ilmiy malakasini oshirishga, balki Jizzax davlat pedagogika universitetining xalqaro miqyosdagi ilmiy aloqalarini kengaytirishga xizmat qiladi. Yangi akademik hamkorliklarni yo‘lga qo‘yish va zamonaviy ta’lim strategiyalarini O‘zbekiston oliy ta’lim muassasalarida qo‘llashda ham bu tashabbus muhim ahamiyat kasb etadi.Ilmiy stajirovkalar orqali yosh olim va tadqiqotchilarni rag‘batlantirish, innovatsion ilmiy loyihalarni ilgari surish va O‘zbekistonning xalqaro ilmiy maydondagi mavqeini yanada mustahkamlash maqsad qilingan.