11-fevral Xalqaro ilm-fan sohasidagi xotin-qizlar kuni munosabati bilan Jizzax davlat pedagogika universiteti Axborot resurs markazi konferensiya zalida “Ilm va ayol: barqaror jamiyat sari” mavzusida anjuman bo‘lib o‘tdi.
Mazkur sana doirasida tashkil etilgan tadbir ayollarning ilmiy salohiyati, ularning barqaror jamiyat qurishdagi o‘rni hamda ilm-ma’rifat taraqqiyotidagi strategik ahamiyatini yoritishga bag‘ishlandi.
Anjumanda universitet rahbariyati, professor-o‘qituvchilar, olima ayollar, soha mutaxassislari hamda talaba-yoshlar ishtirok etdi.
Tadbir davomida ayol olimalarning mas’uliyatli vorisligi, ilmiy izlanishlarning jamiyat taraqqiyotidagi roli, milliy rivojlanishning intellektual poydevorini mustahkamlash masalalari haqida fikr-mulohazalar bildirildi.
So‘zga chiqqanlar xotin-qizlarning ilm-fan sohasidagi faolligi va yutuqlari yurtimiz taraqqiyotining muhim omillaridan biri ekanini alohida ta’kidlashdi.
Anjuman kuni zalni Jizzaxning yetuk olima ayollari va kelajakda ilm yo‘lini tanlagan bo‘lajak olimalar egalladi. Tadbir ilm-fan sohasida faoliyat yuritayotgan bir qator xotin-qizlarni taqdirlash bilan yakun topdi.
