Shu kunlarda hududlarda senatorlar yoshlar bilan uchrashib, ular bilan bevosita muloqotlar o‘tkazishmoqda.
Xususan, Senatning Fan, ta’lim va sog‘liqni saqlash masalalari qo‘mitasi a’zosi, senator Husan Ermatov Jizzax davlat pedagogika universitetida talaba yoshlar bilan uchrashuv o‘tkazdi.
Yoshlarni kasbga bo‘lgan qiziqishini, ularning jamiyatimizda tutgan o‘rni, chuqur bilim olishi bilan birga siyosiy savodxonligini yanada oshirish maqsadida tashkil etilgan uchrashuvda Xalq deputatlari Jizzax viloyati kengashi deputatlari, universitet talabalari va jizzaxlik yoshlar ishtirok etishdi. Samimiy muloqot tarzida o‘tkazilgan uchrashuvda yoshlar uchun ta’lim va ilm-fan sohalarida yaratilayotgan imtiyozlar, sport sohasidagi yangiliklar, madaniyat va san’at sohasida iste’dodli va iqtidorli yoshlarni kashf etish borasida olib borilayotgan ishlar mavzulariga bag‘ishlandi.
Bugun iqtidorli yoshlarni qo‘llab-quvvatlash, ularga yangi imkoniyatlar yaratish, ularning muammolarini aniqlash va hal qilish doimiy e’tiborda ekanligi, aynan shu maqsadda Senat huzurida Yoshlar parlamenti tashkil etilganligi, ular yoshlar huquqlariga oid me’yorlar takomillashtirilishi, yoshlar hayotiga daxldor masalalar yechimi bo‘yicha izchil faoliyat yuritayotgani ta’kidlandi. Uchrashuvda shuningdek, bugungi kunda yoshlarga berilgan imkoniyatlar, xususan, ta’lim sohasida qizlar uchun yaratilgan qo‘shimcha imtiyozlar to‘g‘risida keng to‘xtaldi. Muloqot davomida talaba-yoshlarga parlament va senatorlarning ish faoliyati haqida ma’lumot berildi.
Mamlakatimiz aholisining 60 foizdan ortig‘ini yoshlar tashkil etadi. Demak, ularning sifatli ta’lim olishi choralarini ko‘rish, yoshlarga kasb-hunar o‘rgatish tizimini mukammallashtirish, ular uchun yangi ish o‘rinlarini yaratish muhim vazifa hisoblanadi. H. Ermatov yoshlar bilan suhbatlashar ekan, ularga yaratilayotgan sharoitlar haqida alohida to‘xtalib, yoshlarga havasi kelishini, bugun berilayotgan imkoniyatlardan unumli foydalangan holda o‘z oldlilariga qo‘ygan reja va maqsadlari sari dadil odimlashlari lozimligini ta’kidlab o‘tdi. Senator talaba-yoshlar bilan hayot yo‘li va tajribalari bilan o‘rtoqlashdi. Uchrashuvda ishtirok etgan yoshlarning taklif va fikrlari tinglandi. Uchrashuv so‘ngida yoshlarning har bir fikri, taklifi jamiyatimizni rivojlanishida muhim ahamiyatga ega ekanligi bu kabi uchrashuvlarni ko‘proq o‘tkazish, ularni tinglash kerakligi ta’kidlandi.
“Senator va yoshlar” uchrashuvi mehmonlarning Jizzax davlat pedagogika universiteti 50-yillik tantanalari arafasida qayta ta’mirlanib, talabalar ixtiyoriga topshirilgan, ayni paytda 7/24 rejimida faoliyat yuritayotgan yangi axborot resurs markazi, universitet tuzilmasi qoshida tashkil etilgan “Qatag‘on qurbonlari xotirasi” hamda “Universitet tarixi” muzeylariga tashrifi bilan yakunlandi.
