Vazirlar Mahkamasining 2025 yil 3 fevraldagi tegishli bayoniga muvofiq, 10-15 fevral kunlari “Ilmli ayol – jamiyat ko‘zgusi” mavzusida haftalik tashkil qilindi.
Haftalikda olima ayollar va ilmiy izlanishlar olib borayotgan tadqiqotchi, talaba va o‘quvchi-qizlar ishtirokida ta’lim muassasalari hamda mahallalarda ilmiy-amaliy anjumanlar, xotin-qizlarning ilm-fanga bo‘lgan qiziqishlarini oshirishga qaratilgan turli tadbirlar o‘tkazilishi belgilangan.Jumladan, kuni kecha Jizzax davlat pedagogika universitetida “Ilmli ayol – jamiyat ko‘zgusi” shiori ostida “Ilm-fan sohasidagi ayollar va qizlar” xalqaro kuniga bag‘ishlangan tadbir bo‘lib o‘tdi.
So‘zga chiqqan Ilmiy ishlar va innovatsiyalar bo‘yicha prorektor G‘ayrat Qodirov va boshqalar mamlakatimizda gender tenglikni ta’minlash kafolati sifatida istalgan yoshdagi ayollar va qizlarning fan, texnika va innovatsiyalar yutuqlari rivojidan teng va to‘laqonli foydalanish imkoniyati yaratilganligini e’tirof etishdi.
“Ayol ma’rifatli bo‘lsa, oila ma’rifatli bo‘ladi, oila ma’rifatli bo‘lsa -jamiyat ma’rifatli bo‘ladi. Bugungi kunda Jizzax davlat pedagogika universitetida ham olima ayollarimizning safi kengayayotgani, qizlar bilim olishga hammadan ko‘proq intilishayotgani quvonarli. Zero, bu bilimlar bilan ular kelajak avlodni tarbiyalaydilar. – deydi professor Baxti Ochilova
Shuningdek anjumanda olima ayollar va ilmiy izlanishlar olib borayotgan tadqiqotchi, talaba va o‘quvchi-qizlarga yanada imkoniyat yaratish, xotin-qizlarning ilm-fanga bo‘lgan qiziqishlarini oshirishga qaratilgan turli tadbirlarni o‘tkazish lozimligi ta’kidlandi.
Tadbir nihoyasida universitet badiiy jamoasining konsert dasturi hamda yosh ijodkorlarning she’rlaridan tinglandi.
Qizg‘in munozara, savol-javoblarga boy ilmiy-anjuman so‘ngida bir qator olima ayollarimiz universitet ma’muriyati hamda kasaba uyushmalari qo‘mitasi tomonidan diplom va esdalik sovg‘alari bilan taqdirlanishdi.
