Jizzax davlat pedagogika universiteti Xorijiy tillar fakulteti professor-o‘qituvchilari jahon oliy ta’lim muassasalari reytingida 680-o‘rinni egallagan Vengriya Respublikasining nufuzli ta’lim maskanlaridan biri — Obuda universitetida bo‘lib turishibdi.
Obuda universiteti til o‘qituvchilari tomonidan tashkil etilgan “Professional Development Course: English for Academic and Specific Purposes” nomli xalqaro malaka oshirish kursida ishtirok etayotgan JSDPU vakillari turli davlatlardan kelgan pedagoglar bilan tajriba almashmoqda, o‘z kasbiy mahoratini oshirmoqda.
Mazkur kurs xorijiy tillarni o‘qitish metodikasini takomillashtirish, akademik va kasbiy ingliz tilida samarali muloqot ko‘nikmalarini rivojlantirishga qaratilgan bo‘lib, unda qatnashish professor-o‘qituvchilarimiz uchun xalqaro tajriba va yangi bilimlarni amaliyotga tatbiq etish imkonini beradi.
