“Yangi O‘zbekiston talabalari Olimpiadasi” sport musobaqalarining respublika final bosqichlarida g‘oliblikni qo‘lga kiritgan sportchi talabalar hamda ularning murabbiylarini rag‘batlantirish maqsadida Universitet rektorining tashabbusi bilan Turkiya Respublikasiga bir haftalik ijodiy-ma’rifiy safar tashkil etildi.
Safardan ko‘zlangan asosiy maqsad talabalarning sport sohasidagi yutuqlarini munosib e’tirof etish, ularni yangi marralar sari ruhlantirish, xalqaro tajriba bilan yaqindan tanishtirish hamda dunyoqarashini yanada kengaytirishdan iborat bo‘ldi.
Safar davomida ishtirokchilar Turkiyaning tarixiy, madaniy va diqqatga sazovor maskanlariga tashrif buyurib, mamlakatning boy madaniy merosi, milliy an’analari va zamonaviy taraqqiyot jarayonlari bilan yaqindan tanishdilar. Jumladan, Istanbul shahrining mashhur tarixiy obidalari, madaniy markazlari va go‘zal manzillari bo‘ylab tashkil etilgan sayohatlar talabalar uchun unutilmas taassurotlarga boy bo‘ldi.
Dastur doirasida delegatsiya Istanbul Aydin universitetiga ham tashrif buyurdi. Tashrif davomida universitetning ta’lim jarayoni, xalqaro faoliyati, zamonaviy infratuzilmasi, talabalar uchun yaratilgan shart-sharoitlari hamda sport sohasida amalga oshirilayotgan islohotlar va erishilgan yutuqlar to‘g‘risida batafsil ma’lumot berildi.
Shuningdek, ishtirokchilar universitetning sport majmualari, mashg‘ulot zallari va talabalar uchun mo‘ljallangan boshqa infratuzilma obyektlari bilan tanishdilar. Sportchi yoshlarni qo‘llab-quvvatlash, ularning jismoniy va intellektual salohiyatini rivojlantirish, xalqaro sport musobaqalarida faol ishtirokini ta’minlash borasidagi ilg‘or tajribalar o‘rganildi.
