Jizzax davlat pedagogika universiteti Filologiya fakulteti Rus tili va adabiyoti kafedrasida ilmiy-metodik seminar tashkil etildi. Tadbirda kafedra professor-o‘qituvchilari hamda magistrantlar ishtirok etdilar.
Seminar davomida quyidagi masalalar muhokama qilindi: Rus tili va adabiyoti kafedrasi huzurida doimiy faoliyat yurituvchi ilmiy-metodik seminar ish rejasini muhokama etish va tasdiqlash;Kafedra professori A.T. Nurmanovning Rossiya Federatsiyasi Rossiya xalqlar do‘stligi universitetida 2025-yil 10-sentabrdan 10-oktabrgacha bo‘lib o‘tgan ilmiy stajirovkasi bo‘yicha hisobotini tinglash;“Hozirgi rus tili fani bo‘yicha amaliy mashg‘ulotlarda sun’iy intellekt texnologiyalaridan foydalanish” mavzusida master-klass tashkil etish.
Kafedra mudiri dotsent E.R. Xasanov seminarni ochib, kafedra faoliyatida xalqaro hamkorlik aloqalarini kengaytirish borasida olib borilayotgan ishlar haqida ma’lumot berdi. Kafedra professori A.T. Nurmanov ilmiy-metodik seminarlarning zamonaviy ta’lim jarayonidagi o‘rni, maqsad va vazifalari haqida so‘z yuritib, seminar ish rejasi bilan ishtirokchilarni tanishtirdi. Shuningdek, u Rossiya xalqlar do‘stligi universitetining ta’lim sifatini ta’minlash, ta’lim jarayonini raqamlashtirish va xalqaro tajriba almashinuvi yo‘nalishidagi ilg‘or amaliyotlari to‘g‘risida ma’ruza qildi.
Seminarning amaliy qismida kafedra o‘qituvchisi S.Yu. Islyamova tomonidan “Hozirgi rus tili fani bo‘yicha amaliy mashg‘ulotlarda sun’iy intellekt texnologiyalaridan foydalanish” mavzusida master-klass o‘tkazildi. Mazkur mahorat darsi ishtirokchilarda katta qiziqish uyg‘otdi va o‘quv jarayoniga innovatsion yondashuvlarni tatbiq etish bo‘yicha foydali tavsiyalar berildi.
