Tashkil topishi

Jismoniy tarbiya va sport fakulteti 1976-yilda Jizzax davlat pedagogika institutida ochilgan jismoniy tarbiya yo‘nalishining rivoji natijasida shakllangan. Dastlab ushbu yo‘nalish Pedagogika va boshlang‘ich ta’lim fakulteti tarkibida faoliyat yuritgan bo‘lib, jismoniy tarbiya o‘qituvchilarini tayyorlash uchun alohida kafedra — Jismoniy tarbiya nazariyasi va sport kafedrasi tashkil etilgan. Kafedraga katta o‘qituvchi Ravshan Abdumalikov rahbarlik qilgan, dastlabki o‘qituvchilar safida Hoshim Komilov, Hamidulla Meliyev, Turg‘un Xoldorov, Aslam G‘ulomov, Rahmat Bozorov kabi tajribali pedagoglar faoliyat yuritgan. 1990-yilda jismoniy tarbiya sohasi alohida fakultet sifatida ajralib chiqdi va 1990–1991-yillarda dotsent Turg‘unboy Xoldorov fakultetning ilk dekani sifatida faoliyat boshladi.

Rivojlanish bosqichlari

1990–2000-yillar davomida fakultetda o‘quv jarayonini takomillashtirish, sport turlarini o‘qitish metodikasini rivojlantirish va moddiy-texnik bazani mustahkamlash borasida keng ishlar olib borildi. 1995–1998-yillarda dotsent Bahriddin Bo‘riboyev, 1998–2001-yillarda dotsent Ne’matulla Ismatov, 2001–2019-yillarda dotsent Olim Muqimov fakultet dekanlari sifatida faoliyat yuritganlar. Ularning davrida fakultetda sport zallari, o‘quv maydonlari, ochiq basketbol va voleybol maydonlari barpo etildi. 2006-yilda sobiq rektor, professor Olimjon Do‘smatov tashabbusi bilan hozirgi zamonaviy o‘quv binolari va sport inshootlari qurib bitkazildi.

2010–2020-yillar davomida fakultetning ilmiy salohiyati ortdi, jismoniy madaniyat nazariyasi, sport psixologiyasi, sport fiziologiyasi yo‘nalishlarida ilmiy izlanishlar kengaydi. Fakultet Estoniyaning Tartu universiteti, Rossiyaning Moskva davlat jismoniy tarbiya universiteti, Qozog‘istonning M.Avezov nomidagi universiteti kabi xorijiy ta’lim maskanlari bilan hamkorlikni yo‘lga qo‘ydi. 2021-yilda fakultetda “Sport faoliyati (kurash)” va “Sport faoliyati (voleybol)” yo‘nalishlari ochilib, kadrlar tayyorlash ko‘lami kengaytirildi.

Bugungi faoliyati

Bugungi kunda fakultet “Jismoniy tarbiya va sport fakulteti” nomi bilan faoliyat yuritadi va sohada yetuk o‘qituvchi, murabbiy hamda sport menejerlarini tayyorlash markazlaridan biri hisoblanadi. Fakultet tarkibida “Jismoniy madaniyat nazariyasi va metodikasi” hamda “Sport turlarini o‘qitish metodikasi” kafedralari faoliyat yuritmoqda.

Fakultetda 580 nafardan ortiq bakalavr va 12 nafar magistr talaba tahsil oladi, o‘quv jarayonini 40 dan ortiq professor-o‘qituvchilar olib borishadi, shulardan 6 nafari fan doktori, 10 nafari PhD darajasiga ega. Talabalar jismoniy tarbiya nazariyasi, sport fiziologiyasi, murabbiylik faoliyati, sog‘lom turmush tarzi asoslari kabi fanlarni chuqur o‘rganadilar. Ular respublika va xalqaro musobaqalarda, “Universiada”, “Barkamol avlod”, “Talabalar sport festivali” kabi tanlovlarda muntazam g‘olibliklarni qo‘lga kiritmoqdalar.

Fakultetda o‘quv jarayonida zamonaviy sport zallari, laboratoriyalar, trenajyor xonalari, virtual sport simulyatorlari faoliyat yuritadi. Shuningdek, jismoniy tarbiya sohasida innovatsion o‘quv-uslubiy qo‘llanmalar, ilmiy tadqiqotlar, yosh murabbiylar tayyorlash dasturlari ishlab chiqilgan.