Bugun Jizzax viloyati kasaba uyushmalari tashkilotlari birlashmasi kengashi hovlisida yozgi ta’tilni mazmunli va foydali o‘tkazish maqsadida bolalarni oromgohga kuzatish marosimi bo‘lib o‘tdi.

Marosimda viloyatdagi turli tashkilotlarda mehnat qilayotgan xodimlarning farzandlari, jumladan, Jizzax davlat pedagogika universiteti kasaba uyushmasi qo‘mitasi orqali yo‘llanma olgan 20 nafarga yaqin bolalar va ularning ota-onalari ishtirok etishdi.

Bolalarni oromgohga olib ketuvchi avtobus haydovchilari bilan YHXB (Yo‘l harakati xavfsizligi boshqarmasi) xodimlari maxsus suhbat o‘tkazdi. Unda bolalar xavfsizligini ta’minlash, harakat davomida qoidalarga qat’iy rioya qilish va manzilga bezavol yetib borish masalalari muhokama qilindi.

Jizzax davlat pedagogika universiteti kasaba uyushmasi qo‘mitasi raisi Jahongir Majidov bolalar va ularning ota-onalariga murojaat qilib, oromgohdagi tartib-qoidalarga amal qilish, yangiliklardan bahramand bo‘lib, vaqtni mazmunli o‘tkazish kerakligini ta’kidladi. Shuningdek, farzandlarining ta’til davomida xavfsizligi ta’minlanishi uchun kasaba uyushmasi tomonidan barcha zarur shart-sharoitlar yaratilganini ta’kidladi.

Bolajonlar Zomin tumanida joylashgan “Yulduzcha” bolalar oromgohida dam oladi. U yerda ular uchun turli madaniy-ma’rifiy, sport va ko‘ngilochar tadbirlar rejalashtirilgan bo‘lib, ta’til ular uchun esda qolarli va foydali o‘tadi.