Tarix fakultetida ana shu mavzuda anjuman tashkil etildi.
Mamlakatimizda ulug‘ ajdodlarimiz merosini keng tadqiq va targ‘ib etish, ularning nomini abadiylashtirish, o‘sib kelayotgan navqiron avlodni bobokalonlarimizning faoliyati hamda asarlaridan bahramand etib tarbiyalashga alohida e’tibor qaratib kelinmoqda. Buni shu kunlarda xalqimiz dahosining timsoli, benazir sarkarda va davlat arbobi, sohibqiron Amir Temur tavalludining 689-yilligi munosabati bilan joylarda o‘tkazilayotgan ma’naviy-ma’rifiy tadbirlar, ilmiy-amaliy anjumanlar misolida ham yaqqol ko‘rish mumkin.
Jumladan, Jizzax davlat pedagogika universitetida ham «Amir Temur: tarixi, saboqlari va hozirgi zamon” mavzusida anjuman o‘tkazildi. Tadbirda talaba yoshlar professor o‘qituvchilar hamda OAV xodimlari ishtirok etdi.
Tadbirni professsor Baxtiyor Mirkomilov kirish so‘zi bilan ochib, yurtimizda buyuk davlat arbobi, asrlar islohotchisi, sarkarda, adolat uchun tolmas kurashchi Hazrati Amir Temur bobomiz tavalludining 689-yilligi ijodkorlari, olimlar va yoshlar tomonidan faxr-iftixor bilan yodga olinayotgani, Sohibqiron Amir Temur – biz uchun o‘zligimizni anglash, milliy an’ana va qadriyatlarimizni tiklash borasidagi ulug‘vor ishlarda xalqimizga ma’naviy kuch bag‘ishlab kelayotgan ulug‘ siymolardan biri ekanligi, bugun hayotimizning barcha jabhalarida adolat va haqiqat qaror topayotgan tarixiy bir davrda Amir Temur – bizning sha’n-shavkatimiz, g‘urur va iftixorimiz, xalqimiz dahosining timsoli, ma’naviy qudratimiz ramzi ekanligi xususida so‘z yuritdi.
Tadbirda so‘zga chiqqanlar, Sohibqiron nafaqat o‘z davridagi eng qudratli davlat asoschisi, ilm-fan, madaniyat va ma’naviyat homiysi, balki Osiyo va Yevropa qit’alarida ro‘y bergan tarixiy o‘zgarishlarga hal qiluvchi ta’sir ko‘rsatib, dunyo rivojiga beqiyos hissa qo‘shgan shaxs ekanligini, biz hazrat Amir Temurni buyuk bunyodkor deb boshimizga ko‘tarib, ro‘yi zaminning sayqali bo‘lmish Samarqandda, Shahrisabz, Buxoro, Toshkent va Sohibqiron qurgan bepoyon saltanatning boshqa hududlarida bunyod etilgan nodir me’moriy obidalar, tengsiz bog‘-rog‘lar Temur bobomizga xos amaliy shijoat samarasi ekanligini, alohida ta’kidladilar. Tadbir so‘ngida talaba yoshlar tomonidan buyuk davlat arbobi va qudratli sarkarda hayoti bilan bog‘liq qiziqarli savol-javoblar o‘tkazildi.
