Ushbu sahna asarida 1922 yilda tahsil olish, yurtga qaytgach Turkistonning taraqqiyotiga hissa qo‘shish istagida olis Germaniyaga ketgan, Vataniga qaytgach esa qatag‘onga uchragan yoshlarning hayoti, ularning orzu-intilishlari o‘ziga xos tarzda ochib berilgan. Bugun Jizzax davlat pedagogika universiteti professor-o‘qituvchilari ana shu sahna asarini tomosha qilish uchun Yu. Rajabiy nomidagi viloyat musiqali drama teatrida bo‘lishdi.

Spektakldagi Turkistonni ozod va obod ko‘rishni orzu qilgan, shu maqsadda kurashgan, jadidlarning ko‘magi bilan o‘tgan asrda Germaniyada ta’lim olgan talabalarning obrazi hech bir tomoshabinni befarq qoldirmadi. Jadidlarning ko‘magi bilan Buxorodan Germaniyaga o‘qishga yuborilgan Abduvahhob Murodiy, Sattor Jabbor, Ahmad Shukriy, Xayriniso Majidxonova, Sulton Matqul, Maryam Sultonmurodova, Afzal Abdusaid kabi yoshlarning 1922-1937 yillardagi hayotiga oid voqealar tomoshabinlarni larzaga solgani shubhasiz.

Ta’kidlash joiz spektakl yoshlarni har qanday sharoitda ham ilm olishga, Vatanni ardoqlashga chorlashi bilan ahamiyatlidir.

Eslatib o‘tamiz, professor-o‘qituvchilar hamda ishchi xodimlar uchun namoyish etilgan sahna asari universitet rahbariyati hamda kasaba uyushmalari qo‘mitasi tomonidan tashkillashtirildi.