JDPUda «Sharaf lentasi » ulashish aksiyasi o‘tkazildi.
Bugungi tinch va osuda hayotimizga shukronalik, vatanga, ona-yurtga bo‘lgan muhabbat hislarini uyg‘otish maqsadida, tashkil etilgan «Sharaf lentasi» ulashish aksiyasi faol talabalar va tyutorlar ishtirokida o‘tkazildi.
Universitet hovlisi bo‘ylab “Xotira va qadrlash kuni”ga bag‘ishlangan “Sharaf lentasi” ulashish aksiyasi davomida erta tongdan ishga va o‘qishga kelayotgan ustozlar va talaba yoshlar ko‘ksiga O‘zbekiston davlat bayrog‘i tasviri tushirilgan, Vatan himoyachilarining sharafli qahramonliklarini o‘zida ifodalagan lentalar taqib qo‘yildi. Bunday tadbirlar Ikkinchi jahon urushida qatnashgan ajdodlarimizning jasorati, yorqin xotirasi unutilmas ekanini yana bir bor yodga soladi. Qolaversa, urush qatnashchilari va mehnat faxriylariga hurmatimizni yanada kuchaytiradi. Bu o‘z navbatida yosh avlod qalbida vatanparvarlik, jasorat, mardlik tuyg‘ularini yuksaltirishi bilan yanada ahamiyatlidir.
– “Sharaf lentasi”ni ko‘ksimga taqar ekanman, tinchlik uchun, bugungi farovon kunlar uchun kurashgan ajdodlarimizga nisbatan yana bir bor faxr-u iftixorni his etdim, – deydi faxriy ustoz, dotsent Dilorom Xojimetova – Bu yo‘lda zahmat chekkanlarning mehnati ulug‘, jonini fido etganlarning xotirasi azizdir.
