Jizzax davlat pedagogika institutida 2021 yil 22 Fevral kuni Erasmus+ Milliy ofisi bilan hamkorlikda “Oliy ta`limda innovatsion rivojlanish” mavzusida seminar bo`lib o`tdi. Ushbu seminarning asosiy maqsadi O’zbekistonda OTMlar o’qituvchilari va xodimlarini o’qitishdagi ilg’or tajribalar, o’qitish va oliy ta’limning innovatsion rivojlanishi haqida axborot bilan ta’minlashga qaratilgan edi. Shuningdek,  Boloniya jarayoni tamoyillarini targ’ib qilish, universitetlarning xalqaro reytingini oshirishga yordam berish va Erasmus+ dasturi, navbatdagi tanlovi doirasidagi imkoniyatlar bilan tanishtirishdan iborat bo`ldi.

Seminarni Jizzax davlat pedagogika instituti rektori Sharipov Shavkat Safarovich kirish so`zi bilan ochib berdi. Seminar davomida Erasmus+ Milliy ofisi eksperti Qudratxon Bahodirov, Oliy ta`lim ekspertlar milliy guruhi rahbari Marat Rahmatullayev, Oliy ta`lim ekspertlari milliy guruhi a`zolari Gulbahor Karimova va  Anora Jabborovalar tomonidan Erasmus+ dasturi faoliyati va loyihalarda ishtirok etish imkoniyatlari,  Oliy ta’limda innovatsion usullar,  Ta’lim va ilmiy dasturlarga loyihalar tayyorlash usullari , Ta’limda (kredit tizimida) mikro-kreditlar,  Ma’sofaviy ta’lim jarayonida xorijiy tajribalardan foydalanish mavzularida taqdimotlar qilindi.

Seminarda Jizzax davlat pedagogika instituti rahbariyati, professor o`qituvchilari, tadqiqotchilari bilan bir qatorda Jizzax Politexnika instituti, O`zMU Jizzax filiali vakillari ham ishtirok etishdi. Seminar so`ngida savol-javoblar va muhokama tarzida ko`pchilik o`zi qiziqtirgan savollarga javob oldi.