Jismoniy madaniyat va musiqa fakulteti 1 bosqich talabasi Umarova Sabina Sulton qizi Zulfiya nomidagi Davlat mukofotiga loyiq topildi.
Har yili respublika bo‘ylab an’anaviy ravishda o‘tkazib kelinayotgan Zulfiya nomidagi Davlat mukofoti sovrindorlari qatorida Jizzax davlat pedagogika instituti jismoiy madaniyat va musiqa fakulteti 1 bosqich talabasi Umarova Sabina Sulton qizining g‘olib deb topilishi Jizzax davlat pedagogika instituti jamoasini to‘lqinlantirib yubordi. Yoshligidan sportga mehr berib, tengdoshlari ichida mutloq g‘olib deb topilgan Sabinaxon bugun 19 yoshda.
“Muhtaram Prezidentimiz Shavkat Miromonovich Mirziyoevning o‘z qo‘llari bilan ko‘ksimga taqib qo‘ygan bu mukofot birinchi navbatda meni voyaga yetkazib, oq yuvib, oq tarab, barcha sharoitlarni yaratib bergan ota- onamga, meni chempionlik shohsupasiga yetaklab kelgan ustozim Alisher Tolipovga hamda turli yillarda o‘tkazilgan sport musobaqalarida meni qo‘llab quvvatlab kelgan Jizzaxlik yosh tengdoshlarimga hamda Jizzax davlat pedagogika instituti jamoasiga berilgan mukofot deb bilaman. Ochig‘ini aytadigan bo‘lsam, bu yo‘lni bosib o‘tish oson kechmadi. Gohida tinimsiz murakkab mashqlar, mashg‘ulotlar davomidagi sabr – qanoat, chidam, ayniqsa, mashg‘ulot davomida olgan jarohatlar va o‘z ustimda muntazzam ishlab borishim tufayli mening yoshligimdan ko‘nglimga tugib yurgan orzuim ushaldi”, deb ta’kidlaydi bizning qahramonimiz Sabinaxon.
Prezidentmiz menga oliy darajadagi mukofotni topshirish marosimida: “ Men senga ishonaman, Sabina qizim, bu – hali boshlanishi, yurtimiz bayrog‘ini yuksaklikka ko‘tarishda hech qachon charchama”, degan o‘gitlari bir umr yodimdan chiqmaydi. Bu mukofot menga yanada kuch – quvvat, o‘zimga bo‘lgan ishonchni ikki karra oshirdi hamda 2020 yilda Yaponiyada bo‘lib o‘tadigan Tokio Olimpiadasi o‘yinlarida oltin medalni qo‘lga kiritishimga katta umid uyg‘otdi.
Qahramonimiz haqida qisqacha ma’lumot: Umarova Sabina Sulton qizi 1999 yil 31 oktabr kuni Jizzax viloyatining G‘allaaorol tumanida tug‘ilgan. Millati o‘zbek. 2013 yildan bo‘yon sportning “Yengil atletika” turi bilan shug‘ullanib kelmoqda. 2014 yil Qirg‘izistonda yoshlar o‘rtasida o‘tkazilgan Markaziy Osiyo musobaqasining g‘olibi, 2014 yil Qozog‘istonda o‘tkazilgan Osiy chempionatida ikkinchi o‘rinni, 2015 yil poytaxtimiz Toshkent shahrida o‘tkazilgan O‘zbekiston chempionati g‘olibi, 2017 yil Qirg‘izistonning Bishkek shahrida o‘tkazilgan Halqaro turnir g‘olibi, 2017 yil Qozog‘istonning Olma ota shahrida o‘tkazilgan Halqaro turnirda faxrli ikkinchi o‘rinni, 2017 yil Jizzax shahrida o‘tkazilgan “Barkamol avlod” respublika sport musobaqasida birinchi o‘rinni, 2017 yil Toshkent shahrida yopiq inshootda o‘tkazilgan halqaro musobaqada faxrli birinchi o‘rinni, 2018 yil Toshkent shahrida 1999-2000 yillarda tug‘ilgan o‘smir qizlar o‘rtasida o‘tkazilgan Markaziy Osiyo Ochiq turnirida birinchi o‘rinni, va shu yili Andijon va Namangan viloyatlarida o‘tkazilgan O‘zbekiston ochiq turnirda birinchi o‘rinlarni qo‘lga kiritgan. Qahramonimiz 25 karra O‘zbekiston chempioni, 5 karra Markaziy Osiyo chempioni bo‘lib hisoblanadi.
Biz qahramonimiz Sabinaxonga sport musobaqalarining eng yuqori cho‘qqilarini zabt etishida kuch-kuvvat, mustahkam iroda, sog‘lik va hamisha omad yor bo‘lishini tilab qolamiz.
Jizzax Davlat pedagogika instituti jamoasi
