Jizzax viloyati hokimligi tomonidan tashkil etilgan “Kasb va mehnat kuni” tadbiri doirasida viloyatdagi tashkilotlar, korxona va muassasalar hamda oliy ta’lim muassasalari o‘z ko‘rgazmalari bilan faol ishtirok etdi.
Tadbirda Jizzax davlat pedagogika universiteti fakultetlari tomonidan mutaxassislik yo‘nalishlaridan kelib chiqqan holda ko‘rgazmali burchaklar tashkil qilinib, ishtirokchilarga universitet ta’lim yo‘nalishlari, fakultetlar va kafedralar haqida batafsil ma’lumotlar taqdim etildi. Tashkil etilgan “Bo‘sh ish o‘rinlari yarmarkasi”da universitet bitiruvchilari ham faol ishtirok etib, mehnat bozoridagi imkoniyatlar bilan yaqindan tanishishdi.
Tadbir davomida yoshlar startap loyihalari ko‘rgazmasi, “Eng yaxshi startap g‘oya” tanlovi, yosh rassomlar ko‘rgazmasi ham tashkil etildi. Shuningdek, tadbirga viloyatdagi umumta’lim maktablarining bitiruvchi o‘quvchilari hamda oliy ta’lim muassasalari bitiruvchilari tashrif buyurib, kasb tanlash va bandlik imkoniyatlari yuzasidan kerakli ma’lumotlarga ega bo‘lishdi.
