Jahon tantanalar maskanida 1-oktyabr — “O‘qituvchi va murabbiylar kuni” munosabati bilan yorqin bayram shodiyonasi bo‘lib o‘tdi.

Ushbu tadbirga Jizzax davlat pedagogika universitetining professor-o‘qituvchilari hamda xodimlari taklif etildi.

Tantanani viloyat hokimining o‘rinbosari Akmal Savurbayev ochib berdi. U o‘z nutqida ustoz va murabbiylarni kasb bayrami bilan tabriklab, ularning mehnatini yuksak baholadi.

Shuningdek, universitet rektori Maqsudjon Yuldashev ham so‘zga chiqib, ustozlar va murabbiylarni bayram bilan samimiy tabrikladi. U o‘z nutqida:

“Sizning mehnatingiz, sa’y-harakatingiz va fidoyiligingiz bilan universitetimiz yanada rivojlanib, kelgusi ikki yil ichida dunyodagi eng nufuzli oliy ta’lim muassasalari orasidagi top-1000 ro‘yxatdan munosib o‘rin olishiga ishonaman”, deb ta’kidladi.

Shundan so‘ng taqdirlash marosimi bo‘lib o‘tdi. Bayram arafasida davlat mukofotiga sazovor bo‘lganlar, shuningdek, Oliy ta’lim, fan va innovatsiyalar vazirligi faxriy yorlig‘i va ko‘krak nishonlari, Maktabgacha va maktab ta’lim vazirligi hamda universitet rektori tomonidan taqdim etilgan faxriy yorliqlarga munosib ko‘rilgan ustozlar tantanali ravishda taqdirlandilar.

Universitet badiiy jamoasi tomonidan tayyorlangan kuy-qo‘shiqlar va raqslar bayramga yanada fayz bag‘ishladi. Go‘zal tilaklar, samimiy tabriklar, sho‘x qo‘shiqlar va raqslar bayramona kayfiyatni yanada yuksaltirdi.

Ushbu shodiyona ko‘ngillarga zavq ulashdi. Bayram chin ma’noda bayramdek o‘tdi.