Bugun universitetga biriktirilgan Zargarlik, Sayiljoyi va Toshloq mahallalaridan 32 nafar yosh bilan universitet rektori Yuldashev Maksudjan Abdullayevich ishtirokida uchrashuv o‘tkazildi. Uchrashuv davomida rektor har bir yosh bilan alohida suhbatlashdi.
Suhbatda yoshlarni ish bilan ta’minlash, kasbga yo‘naltirish, tadbirkorlikni qo‘llab-quvvatlash hamda mavjud muammolarni bartaraf etish masalalariga e’tibor qaratildi. Asosiy maqsad yoshlarning muammolarini tinglash va ularga aniq yechim taklif etishdan iborat bo‘ldi.
Uchrashuv yakunida ishtirokchilardan biriga universitetda ish taklif etildi, tadbirkorlikni boshlash arafasida turgan yoshga esa amaliy maslahatlar va imtiyozli kredit olish bo‘yicha tavsiyalar berildi. Mazkur ishlar Yoshlar agentligining shahar bo‘limi rahbari Farzona Adilova bilan hamkorlikda davom ettirilishi belgilandi.
