Ulug‘lardan hikmat bor. O‘tganlarni ulug‘lash tiriklarga hadya bermoq bilan barobardir. Shunday insonlar borki, ularning vafotidan keyingi sog‘inch vaqt o‘tishi bilan nafaqat unutilmaydi, balki borgan sari chuqurlashib boradi. Ana shunday ustozlardan biri Jizzax davlat pedagogika universitetining birinchi rektori, professor B.O‘rinboyevdir. Jizzax davlat pedagogika universiteti 50-yillik tantanalarini nishonlamoqda. Shu munosabat bilan tashkil etilgan “Barhayot siymo” ma’naviy-ma’rifiy tadbiriga universitetning birinchi rektori professor B.O‘rinboyevning farzandlari, shogirdlari taklif etildi. Mehmonlar dastlab universitet rektori qabulida bo‘lishdi. Samimiy suhbat tarzida bo‘lib o‘tgan uchrashuvda universitet rektori oliygohga birinchilardan bo‘lib rahbarlik qilgan ustoz B.O‘rinboyevning yaxshi fazilatlari, fidoyiliklari haqida so‘zladi. Shundan so‘ng mehmonlar universitet hayotiga bag‘ishlangan panno va qaydlarni hurmat bilan ko‘zdan kechirdilar.
Universitet bilan tanishuv…
JDPU birinchi rektori B.O‘rinboyev xotirasiga bag‘ishlangan » Barhayot siymo» ma’naviy-ma’rifiy tadbiriga taklif etilgan mehmonlar universitetda yaratilgan sharoitlar bilan yaqindan tanishishdi. «Professorlar bog‘i»da bo‘lishdi.
Ulug‘ ustozning yodi
Jizzax davlat pedagogika universiteti 50-yillik tantanalari munosabati bilan tashkil etilgan “Barhayot siymo» ma’naviy-ma’rifiy tadbiri madaniyat saroyida davom etdi. Tadbirda B.O‘rinboyevning safdoshlari, oila a’zolari, hamqishloqlari, yaqin do‘stlari va shogirdlari va talaba yoshlar ishtirok etishdi. Tadbirni universitet rektori Sh Sharipov ochib berdi. U o‘z so‘zida olimning oliy ta’lim ravnaqiga, tilshunoslik ilmining rivojlanishiga qo‘shgan hissasi ulkan ekanligini ta’kidladi. Shundan keyin marhum professor B. O‘rinboyevning farzandlari, hamkasblari va shogirdlari ustozni xotirlab so‘zga chiqishdi. Ular shu oliygohni tashkil etishda qatnashgan ko‘plab ustozlarning xizmatlari va yodda qolgan esdaliklarini so‘zlab berishdi.
Aqlini taniganidan to so‘nggi kuni, so‘nggi nafasigacha ilm o‘rgangan B.O‘rinboyevning mehnatlari zoye ketmadi, u o‘zidan yuzlab shogird va ezgu amallarni qoldirdi.Tadbirda olimning oila a’zolari va shogirdlariga universitet 50-yilligi munosabati bilan tashkil etilgan esdalik sovg‘alari va 5 jilddan iborat “Universitet sari odimlar” kitobi topshirildi.
