«Mahalla obod — yurt obod» shiori ostida o‘tkazilayotgan hasharda universitet professor-o‘qituvchilari xodimlar faol ishtirok etishmoqda.

Yurtning obod bo‘lishiga o‘zining munosib hissasini qo‘shishni insoniy burchi deb bilgan oliygoh xodimlari ayni damda hasharni universitet hududida davom ettirmoqdalar.

Bugun chindan ham hashar ozodalik, saranjomlik, ahillik va hamjihatligimiz ramzi ekanini yana bir karra namoyon etmoqda. Universitetning ichki va tashqi hududlarida obodonlashtirish ishlari bilan birgalikda o‘quv dargohining dars xonalari, ma’muriy xonalar, kafedralar, oshxona, axborot-resurs markazi tozalanib tartibga keltirildi.

Shuningdek, ta’lim muassasasining atrofi va hovlisidagi yashil maydon hududlarida qurib qolgan begona o‘tlar yulib tashlandi, tartibga keltirildi, daraxtlar oqlandi va qurigan shoxlari kesildi.

Bir so‘z bilan aytganda o‘tkazilgan umumxalq xayriya hashari universitet rahbariyati, professor-o‘qituvchilari, xodimlari va talabalari orasida ko‘tarinki kayfiyat bilan o‘tdi. Zero, hashar hamjihatlik, obodlik va yaratuvchanlik ramzi sifatida shakllangan mehr-oqibat muhitini yanada mustahkamlashga xizmat qiladi.