Mamlakatimizda gender tenglikni ta’minlashga qaratilgan davlat siyosati doirasida xotin-qizlarning huquq va imkoniyatlarini kengaytirish, jamiyatdagi o‘rnini mustahkamlash borasida izchil ishlar amalga oshirilmoqda.
Shu munosabat bilan Jizzax davlat pedagogika universitetida gender tenglik masalalari yuzasidan navbatdagi audit yig‘ilishi bo‘lib o‘tdi.
Yig‘ilish O‘zbekiston Respublikasining xotin-qizlar va erkaklar uchun teng huquq hamda imkoniyatlarga oid qonunchiligi, shuningdek, tegishli vazirlik va idoralar qarori hamda uslubiyatlar asosida tashkil etildi.
Tadbirda O‘zbekiston ta’lim va fan xodimlari kasaba uyushmasi Respublika kengashining Jizzax viloyati bo‘yicha mas’ul tashkilotchisi B.Qodirov, JDPU rahbariyati, fakultet dekanlari, maslahatchilar, psixologlar hamda Axborot resurs markazi va boshqa bo‘limlar vakillari ishtirok etdi.
Uchrashuvda universitetda ayollar va erkaklar uchun teng imkoniyatlar yaratilishi, rahbarlik lavozimlariga kirish, ilmiy va ijodiy faoliyatda ishtirok etish kabi yo‘nalishlar bo‘yicha tahlillar o‘tkazildi.
Auditning asosiy maqsadi — JDPUda gender tenglik siyosatining amaliy ijrosini baholash, mavjud muammolarni aniqlash va samarali tajribalarni ommalashtirishdan iborat bo‘ldi.
