Bugun Jizzax davlat pedagogika universitetida Qozon Federal universiteti qoshidagi Yelabuga instituti direktori Yelena Merzon hamda oliygoh rektori Sh.Sharipov ishtirokida uchrashuv bo‘lib o‘tdi.
Mazkur uchrashuv har ikki oliygoh faoliyatining tanishuvi bilan boshlandi. Tomonlar manfaatli kelishuvlar qatorida kelajakda Qozon Federal universiteti hamda JDPU bilan hamkorlik aloqalarini o‘rnatish, kelishuvlar natijasiga ko‘ra hamkorlik memorandumini imzolash to‘g‘risida ham so‘z yuritishdi.
O‘zaro suhbat davomida universitet rektori Sh.Sharipov Robototexnika va Mexatronika yo‘nalishi, magistratura mutaxassisligi bo‘yicha qo‘shma ta’lim dasturini tashkil etish, professor-o‘qituvchilarni ma’ruza o‘qishga taklif qilish, talabalar almashuvi, ularning qisqa muddatli amaliyotlarini tashkil etish kabi bir qator takliflarni bildirdi.
Shuningdek muloqot davomida Yelabuga instituti direktori Yelena Merzon hamkorlikni amalga oshirish bo‘yicha aniq yo‘nalishlar belgilash bilan bir qatorda, Jizzax davlat pedagogika universiteti rahbariyati, professor-o‘qituvchilarini Qozon Federal universiteti qoshidagi Yelabuga institutiga taklif etdi.
Uchrashuv do‘stona munosabatlar asosida yakunlandi. QFU qoshidagi Yelabuga instituti direktori Yelena Merzonga Jizzax davlat pedagogika universiteti faoliyatidan hikoya qilguchi ramziy sovg‘alar topshirildi.
