Jizzax davlat pedagogika universiteti Filologiya fakultetida “Bitiruvchi – 2026” mavzusida ish beruvchilar bilan uchrashuv hamda yakuniy ishga taqsimot tadbiri tashkil etildi.

Tadbirda fakultet bitiruvchilari, universitet rahbariyati hamda viloyatdagi tegishli tashkilotlar vakillari ishtirok etdilar. O‘quv ishlari bo‘yicha prorektor Haqberdi Hamzayev bitiruvchilarga kelgusi kasbiy faoliyatida zarur bo‘lgan amaliy ko‘nikmalar, mas’uliyat va zamonaviy mehnat bozori talablari haqida fikr bildirdi.

Shuningdek, Jizzax viloyat Maktabgacha va maktab ta’limi boshqarmasining Inson resurslarini boshqarish va rivojlantirish bo‘limi boshlig‘i B. Norbo‘tayev, viloyat maktabgacha va maktab ta’limi bo‘limlari rahbarlari, Kambag‘allikni qisqartirish va bandlik bosh boshqarmasi vakili A. Fayziyev, Davlat xizmatini rivojlantirish agentligi (ARGOS)ning Jizzax viloyati filiali hamda O‘zbekiston Respublikasi Milliy banki AJ Jizzax filiali “Kelajakka qadam” dasturi mas’uli F. Nizomovlar bitiruvchilarga mavjud bo‘sh ish o‘rinlari, bandlik imkoniyatlari va tanlov tartiblari haqida atroflicha ma’lumot berdilar.

Uchrashuv ochiq muloqot shaklida o‘tib, bitiruvchilar o‘zlarini qiziqtirgan savollarga mutaxassislardan bevosita javob olish imkoniyatiga ega bo‘ldilar. Tadbir bitiruvchilarning kasbiy yo‘nalishini aniqlashtirish hamda ularni mehnat bozoriga samarali integratsiya qilishga xizmat qildi.