A.Qodiriy nomidagi Jizzax davlat pedagogika universiteti Maktabgacha va boshlang‘ich ta’lim fakulteti Boshlang‘ich ta’lim pedagogikasi kafedrasida 2025-yil 14-noyabr kuni “Boshlang‘ich ta’limning zamonaviy tendensiyalari: ta’lim va tarbiya jarayonida didaktik vositalardan foydalanishning dolzarb vazifalari” mavzusida xalqaro ilmiy-amaliy konferensiya tashkil etildi.
Tadbirni universitet rektori, professor Yuldashev Maqsud Abdullayevich ochib berib, mamlakatimizda ta’lim sohasi, xususan maktabgacha va boshlang‘ich ta’lim yo‘nalishlariga berilayotgan e’tibor, zamonaviy didaktik vositalar va sun’iy intellektning o‘quv jarayonidagi o‘rni haqida so‘z yuritdi.
Konferensiyada O‘zbekiston bilan bir qatorda Turkiya, Ozarbayjon, Rossiya, Qozog‘iston, Tojikiston kabi davlatlarning yetakchi olimlari, pedagoglari va metodistlari ishtirok etib, boshlang‘ich ta’limning dolzarb masalalari, innovatsion metodlar, sun’iy intellektdan foydalanishning afzalliklari, xalqaro baholash dasturlari hamda ilg‘or pedagogik yondashuvlar bo‘yicha ma’ruzalar taqdim etdilar.
Xususan, Turkiya Respublikasidan prof. Dr. Mustafa Çevik, Ozarbayjon Fan va ta’lim vazirligidan Buyukaga Mikayili, Janubiy Qozog‘iston universitetidan prof. Saule Abdrazakhovna, Yangi Asr universitetidan prof. Dilmurad Mamatov, Guliston davlat universiteti professori Baxtiyor Raximov va boshqa mutaxassislarning chiqishlari ilmiy muhokamalarga boy bo‘ldi.
Tadbir doirasida ma’ruzalar tinglanib, fikr almashuvlar o‘tkazildi. Anjuman yakunida 200 dan ortiq mahalliy va 20 ga yaqin xorijiy tadqiqotchilarning maqolalaridan iborat ilmiy to‘plamni chop etish rejalashtirilgan.
