O‘rganish jarayonida ishchi guruh a’zolari hamda universitet mas’ullari ishtirokida talabalar turar joylarining mavjud holati, xonalar va umumiy foydalanish joylarining sanitariya-gigiyena talablariga muvofiqligi, obodonlashtirish va tozalik ishlari, zarur jihozlar bilan ta’minlanganlik darajasi, shuningdek, yong‘in xavfsizligi talablariga rioya etilishi holati ko‘zdan kechirildi.

Shuningdek, talabalarni yangi o‘quv yilida munosib sharoitda kutib olish, turar joylarda yashash uchun zarur shart-sharoitlarni yanada yaxshilash hamda aniqlangan kamchiliklarni bartaraf etish bo‘yicha mas’ullarga tegishli vazifa va tavsiyalar berildi.

20-avgustdan 30-sentyabrga qadar oliy ta’lim tashkilotlarida talabalarni turar joy bilan ta’minlashda yuzaga kelishi mumkin bo‘lgan muammolarni tezkor bartaraf etish maqsadida «Dolzarb qirq kunlik» e’lon qilingan.

Jizzax davlat pedagogika universitetida ham yangi o‘quv yilini yuqori tashkiliy darajada boshlash, talabalar uchun munosib va xavfsiz sharoitlar yaratish, talabalar turar joylarining tayyorgarlik holatini yanada yaxshilash borasidagi ishlar izchil davom ettirilmoqda.