O‘tgan galgi uzluksiz kasbiy rivojlanish seminarlari doirasida Ravshan Jo‘rayevich ishtirokida tashkil etilgan 3 kunlik seminarlarda qatnashgan ishtirokchilar orasidan saralab olingan 30 nafar mentor o‘zlarining mualliflik taqdimot-darslarini maxsus tuzilgan komissiyaga namoyish etdilar.

Taqdimot-darslar davomida har bir mentorga o‘z faniga muvofiq mavzu berildi va ular mazkur fan doirasida bitta zamonaviy ta’lim metodidan foydalangan holda dars o‘tishdi. Dars jarayonlari universitet tomonidan tuzilgan maxsus komissiya hamda Ravshan Jo‘rayevich tomonidan bevosita kuzatib borildi va yakunida xolis baholandi.

Darslar belgilangan bosqichlar asosida o‘tkazilib, ularda bajaruvchi o‘qituvchining familiyasi, ismi, qaysi fan o‘qitishi, ilmiy darajasi va pedagogik staji, qo‘llanilgan metod nomi, ajratilgan vaqt, guruhlar bilan ishlash tartibi hamda tarqatma materiallar mazmuniga alohida e’tibor qaratildi.

Taqdimotlar yakunida barcha mentorlarga qo‘yilgan baholar e’lon qilindi. Komissiya xulosasiga ko‘ra, mentorlarning dars o‘tish metodlari, vaqtdan samarali foydalanishi va umumiy yondashuvi ijobiy baholandi. Ta’kidlanganidek, agar mentorlar kelgusida ham shunday mazmunda va metodik jihatdan puxta darslar o‘tishsa, bu ta’lim sifati oshishiga xizmat qiladi.

Seminar yakunida o‘quv ishlari bo‘yicha prorektor H. Hamzayev ham o‘z fikr-mulohazalarini bildirib, mentorlarga ushbu taqdimot-darslarda qo‘llangan metod va tajribalarni kafedralardagi barcha o‘qituvchilarga yetkazish muhimligini ta’kidladi. Bu, o‘z navbatida, ta’lim sifati va samaradorligini yanada oshirishga xizmat qilishi qayd etildi.