Jizzax davlat pedagogika universiteti Xorijiy tillar fakulteti Ingliz tili amaliy kursi kafedrasi tomonidan “Xorijiy tillarni o‘qitishning zamonaviy tendensiyalari masalalari (muammo va yechimlar)” mavzusida sohada olib borilayotgan ilmiy izlanishlarning dolzarb muammolari, amaliyotda erishilgan yutuqlar va belgilangan vazifalarni globallashuv sharoitida chet tillarni o‘qitishning turli xil yondashuvlarini, bajarish mexanizmlarini, zamonaviy tendensiyalari masalalarini muhokama qilish maqsadida Xalqaro ilmiy-amaliy anjuman o‘tkazildi. Konferensiyada Amerika Qo‘shma Shtatlarining O‘zbekistondagi elchixonasidan Amerika taʼlim almashinuv dasturi aʼzolari, Buyuk Britaniyadan, Qozog‘istondan va Respublikamizdagi oliy taʼlim muassasalaridan jumladan, Urganch davlat universiteti, Farg‘ona davlat pedagogika universiteti, O‘zbekiston Milliy Universiteti, O‘zbekiston davlat Jahon tillari universitetidan sohaning yetuk olimlari, professorlar, pedagog-o‘qituvchilar, doktorantlar, magistrlar ishtirok etishdi.
Konferensiya ishini Jizzax davlat pedagogika universiteti o‘quv ishlari bo‘yicha prorektor Botir To‘xtamishev ochib berdi. U o‘z nutqida har bir tilning millat taraqqiyotida tutgan o‘rni, o‘zbek tilining huquqiy maqomi, xorijiy tillarini chuqur o‘rganish o‘quvchi-yoshlarning zamonaviy bilimga ega bo‘lishi va professional ko‘nikmalarni egallashining asosiy omili va sharti ekanligi haqida to‘xtalib o‘tdi.
Shundan so‘ng mavzu yuzasidan Jizzax davlat pedagogika universiteti, Xorijiy tillar fakulteti dekani f.f.d. professor Abdug‘ofur Mamatov, Amerika taʼlim almashinuv dasturi o‘qituvchisi Holly Macfarlane, Buyuk Britaniyaning NILE instituti professor – o‘qituvchilari Phill Ball, Claudia Ferradas, Farg ʼona davlat universiteti dotsentlari D.Ganiyeva, F.Qosimov, Urganch davlat universiteti dotsenti G.Raximova hamda universitetimiz professor-o‘qituvchilari o‘z maʼruzalari bilan ishtirok etishdi. Konferensiya so‘ngida taqdim etilgan materiallar asosida Xorijiy tillarni o‘qitishning zamonaviy tendensiyalarini o‘rganish asosida yo‘l xaritasi ishlab chiqish va bosqichma-bosqich amalga oshirish yuzasidan takliflar bildirildi.
