Tanishuv universitet foyesida rus tili va adabiyoti yo‘nalishida tahsil olayotgan talabalar tomonidan ijro etilgan rus xalq qo‘shiqlaridan iborat musiqiy chiqishlar bilan boshlandi.

Shundan so‘ng mehmonlar STEAM parkdagi amaliy mashg‘ulot jarayonlari, shuningdek, kimyo va biologiya laboratoriyalarida o‘tkazilayotgan darslar bilan tanishdilar.

Sayohat davomida Jismoniy tarbiya va sport fakulteti faoliyati, xususan, boks, kurash, gimnastika va voleybol yo‘nalishlaridagi o‘quv-mashg‘ulot jarayonlari ko‘zdan kechirildi. Shuningdek, universitet huzurida barpo etilayotgan tibbiyot klinikasining qurilish ishlari bilan ham tanishuv o‘tkazildi.

Mehmonlar universitet hududidagi basseyn, stol tennisi zali hamda ochiq sport maydonlarini tomosha qildilar. Madaniyat saroyida esa musiqa ta’limi yo‘nalishi talabalari va professor-o‘qituvchilarining hisobot konserti, jumladan, orkestr, dirijyorlik va opera san’atiga tayyorgarlik jarayonlari namoyish etildi.

Shuningdek, mehmonlar universitet kutubxonasi hamda “Qatag‘on qurbonlari xotirasi” muzeyida bo‘lib, ma’naviy-ma’rifiy meros bilan yaqindan tanishdilar.

Tanishuv tashrifi yakunida universitet hovlisidagi “Professorlar bog‘i”da ko‘chat ekish marosimi o‘tkazilib, ushbu tadbir hamkorlik va do‘stlik ramzi sifatida baholandi.