Jizzax Davlat pedagogika universiteti “Maktabgacha ta’lim” yo‘nalishi 1–kurs talabalar tomonidan “Sirli topshiriq”nomli ertak spektakli sahnalashtirildi.

Oliygohning madaniyat saroyida Maktabgacha ta’lim metodikasi kafedrasi o‘qituvchilari tomonidan tashkil etilgan teatr tomoshasiga bog‘cha tarbiyalanuvchilari, imkoniyati cheklangan bolajonlar hamda talablarning ota-onalari taklif etildilar.

Talabalar ustozlari yordamida sahnalashtirgan teatr postanovkasi tomoshabinlarni ertaklar olami bo‘ylab sayohatga boshlaydi. Xususan, Robot-ertakchi bilan uchrashuv — topishmoq va kalit, Buratino va Malvina — shubhalar va haqiqatni izlash, Sirli Yovuz bilan uchrashuv — sirning fosh bo‘lishi kabi sahna ko‘rinishlari tomoshabinni o‘ziga jalb qiladi. Yakunda ertaklar olamidagi muvozanat tiklanadi. Har doimgidek ezgulik g‘alaba qozonadi Qahramonlar har biri tegishli xulosani chiqaradi. Ertak spektakl aynan bolajonlar, yosh tomoshabinlar uchun maxsus yozilgan asar sanaladi. Tarbiyaviy ahamiyatga ega bu asar bolalar tilida yozilgan bo‘lib, undagi syujetlar bolalarni har qanday vaziyatda ham to‘g‘ri so‘zlashga, beodob bo‘lmaslikka, hamisha yaxshilik qilishga chorlaydi.

Ota-onalar va bolajonlar e’tiboriga havola etilgan teatr tomoshasi so‘ngida faol ishtirokchilar faxriy yorliqlar bilan taqdirlanishdi.