Ochiq muloqot shaklida o‘tkazilgan tadbirda tuman hokimi Sohib Islomov, Biznes-ombudsman Jizzax viloyati hududiy boshqarmasi rahbari S. Usmanov, tuman mas’ul tashkilotlari rahbarlari, universitet rahbariyati, professor-o‘qituvchilar hamda forishlik talaba-yoshlar ishtirok etdi.

Uchrashuv davomida talabalar startap loyihalarni amalga oshirish, imtiyozli kreditlardan foydalanish, bandlikni ta’minlash hamda tuman markazidan joy ajratish masalalarida taklif va savollar bilan murojaat qildilar.

Ma’lumot o‘rnida, bugungi kunda universitetda 741 nafar forishlik talaba tahsil olmoqda. 2024–2025-o‘quv yilida 268 nafar bitiruvchidan 262 nafari ish bilan ta’minlangan. Joriy yilda bitiruv arafasida turgan 228 nafar yosh mutaxassisning bandligini ta’minlash bo‘yicha tegishli choralar belgilandi.

Forish tumani hokimligi va universitet o‘rtasida hamkorlik memorandumi imzolandi.Hujjat Forish tumani hokimi Islomov Sohib Yaxshibekovich va universitet rektori Yuldashev Maksudjan Abdullayevich tomonidan imzolandi.

Memorandumga muvofiq, ta’lim, ilmiy-tadqiqot, innovatsion faoliyat, kadrlar tayyorlash va qayta tayyorlash hamda hududiy ijtimoiy-iqtisodiy rivojlanish masalalarida o‘zaro manfaatli hamkorlikni yo‘lga qo‘yish nazarda tutilgan.

Shuningdek, Forish tumani ta’lim muassasalari uchun malakali pedagog kadrlar tayyorlash, talabalarning pedagogik amaliyotini hududda tashkil etish, pedagoglar malakasini oshirish kurslarini o‘tkazish, ilmiy-amaliy anjumanlar va innovatsion loyihalarni amalga oshirish, iqtidorli yoshlarni qo‘llab-quvvatlash kabi yo‘nalishlar belgilab olindi.