Jizzax davlat pedagogika universiteti rektori, professor Sh.S.Sharipov AQSHning Toshkentdagi elchixonasi hamkorligida Xalqaro shartnoma asosida Xorijiy tillar fakultetida bir yil davomida samarali faoliyat yuritgan ingliz tili mutaxassisi Sandra Israel xonim bilan rasmiy xayrlashuv uchrashuvini o‘tkazdi.
Uchrashuv davomida Sandra Israel xonim JDPUda o‘tkazgan bir yillik mehnat faoliyatini katta mamnuniyat bilan yodga oldi. U universitetda yaratilgan keng imkoniyatlar, ilmiy muhit, ustozlar va talabalarning bilim olishga bo‘lgan ishtiyoqini yuksak baholab, JDPU jamoasiga minnatdorchilik bildirdi. «Bu yerda ishlash juda mazmunli va zavqli bo‘ldi», — deya ta’kidladi mehmon mutaxassis.
Ushbu muddat mobaynida Sandra Israel xonim nafaqat talabalarga ingliz tilidan saboq berdi, balki “Teacher Study Circle” to‘garagi orqali mahalliy o‘qituvchilarning metodik ko‘nikmalarini rivojlantirishda ham muhim o‘rin tutdi.
Universitet rektori Sh.S.Sharipov Sandra Israel xonimning fidokorona mehnatini yuqori baholar ekan, JDPU nomidan unga maxsus sertifikat va esdalik sovg‘alarini topshirdi. Uchrashuv samimiy ruhda o‘tdi va tomonlar kelgusida ham hamkorlikni davom ettirish niyatida ekanliklarini bildirdi.
