“Ekolog” jamoat birlashmasi, tabiiy fanlar fakulteti bilan hamkorlikda amalga oshirilgan mazkur seminarda tabiat va ekologiyaga befarq bo‘lmagan talaba yoshlar jalb qilindi. 30 mart – Xalqaro chiqindisiz kun munosabati bilan tashkil etilgan seminarni «Ekolog! jamoat birlashmasi vakili, Nodira Alimova ochib berdi. Shundan so‘ng yosh ekotrenerlar jamiyatda ekologik va tibbiy madaniyatni yuksaltirishni hamda O‘zbekistonning har bir viloyati, xususan Jizzax shahrida yugurib chiqindini terish (plogging)ni tashkil qilish orqali yoshlarda sog‘lom turmush tarzini targ‘ib qilishga qaratilgan taqdimotlarini namoyish etishdi. Seminar-trening davomida yosh ekotrenerlar tomonidan atrof-muhitni zararlantirayotgan chiqindi va uning turlari, parchalanish muddatlari, ekologik vaziyatni yaxshilash uchun bajarilishi zarur bo‘lgan vazifalar to‘g‘risida batafsil axborot va ma’lumotlar yetkazildi. Shuningdek, plogging (yugurib chiqindi yig‘ish) nima va uning tarixi, dunyoning turli mamlakatlarida o‘tkazilayotgan plogginglar va ularning atrof-muhit va sog‘liq uchun muhimligi bo‘yicha bilim va ko‘nikmaga ega bo‘lishdi.

Kunning ikkinchi yarmida amaliy mashg‘ul, ya’ni plogging o‘tkazildi. Jizzax shahridagi «Navro‘zbuloq» hududi ekovolontyorlar tomonidan yig‘ib olindi.

Plogging yakunida eng ko‘p chiqindi to‘plagan talaba yoshlar jamoat birlashmasi tomonidan rag‘batlantirildilar.