Jizzax davlat pedagogika universitetida “Qadriyatlaring boqiy bo‘lsin, Navro‘z!” degan bosh g‘oya asosida keng nishonlanmoqda.

Ushbu sana munosabati bilan universitet “Professorlar bog‘i”da tashkil etilgan bayram sayli ham shubha yo‘qki, professor-o‘qituvchilar, ishchi xodimlar va talaba yoshlar ko‘nglida bugungi tinch va osuda kunlarimiz uchun shukronalik kayfiyatini uyg‘otdi. Tadbirni universitet rektori bayram tabrigi bilan ochib berdi.

Universitetdagi barcha fakultetlar o‘zbek millatining ezgu qadriyatlarini asrab-avaylash, urf-odat va an’analari bardavomligini ta’minlash, yosh avlodni milliy qadriyatlarga hurmat hissini uyg‘otish maqsadida milliy taomlar, milliy liboslar va milliy sahna bezaklari va ko‘rgazmalari bilan bayramga fayz qo‘shishdi. Bugungi bayram tadbirida ayni hamjihatlik,  do‘stlik munosabatlari tarannum etildi. Qadriyatlar ulug‘landi. Tinchlikni,  Vatanni va bahorni madh ettiruvchi dilrabo kuy-qo‘shiqlar yangradi. Jozibador raqslar ijro etildi. Navro‘z arafasida turli tanlovlar va sport musobaqalarda g‘olib bo‘lgan faol ustozlar va talaba yoshlar taqdirlanishdi. Bahorning va bayramning shoh taomi sumalak ulashildi.

Universitetdagi E.Lutfullayev nomidagi talabalar maqomchilar ansamblining dilbar taronalari, yosh ijodkor talabalarning bayramona chiqishlari tadbir ishtirokchilariga yanada ko‘tarinki kayfiyat ulashdi. Tantanalardan so‘ng barcha mehmonlar Navro‘z dasturxoniga taklif etildi.