Abituriyentlar uchun hayajonli damlar boshlanish arafasida.
Jizzax davlat pedagogika universitetiga kirish uchun ro‘yxatdan o‘tgan abituriyentlarga kasbiy (ijodiy) imtihonlar ertaga 25-iyuldan boshlanadi.
Qayd etish lozimki, imtihonlarni adolatli va xolis o‘tkazish maqsadida Oliy taʼlim, fan va innovatsiyalar vazirligining tegishli buyrug‘i bilan bir guruh mutaxassislar oliy taʼlim muassasalarida o‘tkaziladigan ijodiy imtihonlarga tayyorgarlik jarayonlari bilan tanishib chiqishmoqda. Mutaxassislar ijodiy imtihonlar o‘tadigan joy va xonalar, abituriyentlar ota-onalari va kuzatuvchilar uchun yaratilgan sharoitlarni ko‘zdan kechirishi bilan bir qatorda, muassasa hududida imtihonlarni sanitariya-gigiyena qoidalariga amal qilgan holda o‘tkazish, jarayonlarni videotranslyatsiya qilish, har bir hududni navbatchi tez tibbiy yordam mashinasi bilan taʼminlash, jarayon haqida tezkor axborot berib borish, imtihon jarayonlariga ommaviy axborot vositalari, jamoatchilik vakillarini taklif etish bo‘yicha tegishli tavsiyalarni berishdi.
Bugun har bir oliy taʼlim muassasalari oldida muhim masala turibdi u ham bo‘lsa kasbiy(ijodiy) imtihonlarni adolatli va shaffof o‘tkazish. Mana shunday hayajonli lahzalarda ko‘nglida bir dunyo orzular bilan talaba degan nomga sazovor bo‘lish istagida bo‘lgan yoshlarga omad yor bo‘lsin deymiz.
