O‘zbekiston Respublikasi Bosh prokurorining birinchi o‘rinbosari B. Valiyev boshchiligidagi ishchi guruh Jizzax davlat pedagogika universitetiga tashrif buyurib, belgilangan vazifalar ijrosi bilan tanishdi.
Tashrif davomida talabalar o‘rtasida shakllantirilgan «Qalqon» jamoatchilik guruhi faoliyati taqdim etildi. Shuningdek, rektor Maksudjan Yuldashev universitetda huquqbuzarliklarning barvaqt oldini olish, yoshlar bilan manzilli ishlash va sog‘lom ma’naviy-psixologik muhitni ta’minlash borasida amalga oshirilayotgan ishlar haqida ma’lumot berdi.
Ishchi guruhi a’zolari profilaktik tadbirlar, mas’ul tashkilotlar bilan hamkorlik va talabalar muammolarini barvaqt aniqlash mexanizmlari bilan tanishdilar.
Tashrif doirasida «Oilaviy nizolarni mediatsiya yo‘li bilan hal etish» mavzusida seminar tashkil etildi. Unda oilaviy nizolarning oldini olish va ularni tinch yo‘l bilan hal etish masalalari muhokama qilindi.
Seminarda nizolarni sudgacha hal etish, mahalla yettiligi va mas’ul tashkilotlar hamkorligini kuchaytirish, oilalarda sog‘lom muhitni ta’minlash yuzasidan taklif va tavsiyalar bildirildi.
Tadbirda huquqni muhofaza qiluvchi organlar rahbarlari, oliy ta’lim muassasalari professor-o‘qituvchilari, mas’ul idoralar vakillari hamda Jizzax shahri va tumanlar mahalla yettiligi a’zolari ishtirok etdilar.
Yakunda huquqbuzarliklarning barvaqt oldini olish, oilalarda sog‘lom muhitni mustahkamlash va idoralararo hamkorlikni rivojlantirish bo‘yicha kelgusi vazifalar belgilab olindi.
