Jizzax davlat pedagogika universiteti Madaniyat saroyida “Yoshlar orasida giyohvandlik vositalari va psixotrop moddalar tarqalishining oldini olish” oyligi doirasida keng qamrovli profilaktik targ‘ibot tadbiri tashkil etildi.

Tadbirdan ko‘zlangan asosiy maqsad — talabalar ongida sog‘lom turmush tarzini shakllantirish, ularni zararli odatlardan yiroq bo‘lishga undash hamda giyohvandlik va psixotrop moddalar iste’molining salbiy ijtimoiy-huquqiy oqibatlari haqida tushunchalarini yanada kengaytirishdan iborat bo‘ldi.

Tadbir davomida tibbiyot mutaxassislari hamda huquq-tartibot idoralari vakillari tomonidan giyohvandlikning inson salomatligiga, oila va jamiyat barqarorligiga ta’siri, shuningdek, qonunchilikda belgilangan javobgarlik choralari yuzasidan atroflicha ma’lumotlar berildi. Savol-javoblar orqali talabalarning mavzu yuzasidan fikr-mulohazalari tinglandi.

Tadbir so‘ngida universitetning “Ilhom” talabalar teatr-studiyasi tomonidan sahnalashtirilgan “Kech” nomli spektakl namoyish etildi. Mazkur sahna asari giyohvandlikning og‘ir va qaytarilmas oqibatlarini badiiy talqinda yoritib, tomoshabinlarda chuqur taassurot qoldirdi.

Ushbu tadbir yoshlar o‘rtasida sog‘lom hayot tarzini qaror toptirish va huquqbuzarliklarning oldini olishga qaratilgan muhim ma’naviy-ma’rifiy tashabbus sifatida ahamiyat kasb etdi.