“O‘zbekiston – 2030” strategiyasini “Yoshlar va biznesni qo‘llab-quvvatlash yili”da amalga oshirishga oid davlat dasturining tegishli bandi ijrosini ta’minlash maqsadida Raqamli texnologiyalar vazirligi tomonidan Markaziy saylov komissiyasi bilan hamkorlikda “E-saylov” axborot tizimi ishlab chiqilib, test rejimida ishga tushirildi.

Mazkur axborot tizimi saylovlarni samarali tashkil qilishda raqamli texnologiyalardan foydalanish orqali saylov jarayoni ishtirokchilari tomonidan saylov komissiyalariga hujjatlarni taqdim etish, saylov komissiyalarining qarorlarini qabul qilish, shuningdek saylovlarni tashkil etish va o‘tkazish bilan bog‘liq boshqa harakatlarni elektron shaklda amalga oshirish imkoniyatlarini yanada kengaytirishga xizmat qiladi.

Foydalanuvchilarining “E-saylov” axborot tizimida samarali foydalanishi bo‘yicha nazariy bilimlarini shakllantirish va tizimda ishlash tartibi bo‘yicha amaliy ko‘nikmalarini mustahkamlash maqsadida, Jizzax viloyati saylov komissiyasi hamda «Uztelekom» Jizzax filiali hamkorligida Jizzax davlat pedagogika universitetida o‘quv-amaliy mashg‘ulotlar o‘tkazildi.

Ushbu o‘quv-amaliy mashg‘ulotlarida viloyat saylov komissiyasi, raisining o‘rinbosarlari va kotiblari qatnashdi.

Tinglovchilar tizim foydalanuvchisi sifatida Saylov kodeksida belgilangan tartibda o‘zlari bevosita amalga oshirishi lozim bo‘lgan harakatlarni, jumladan axborot tizimida murojaat, so‘rovnomani yaratish, yuborish, ko‘rib chiqish, qaror qabul qilish kabi harakatlarni bevosita bajarish orqali amaliy ko‘nikmalarini mustahkamlashga erishdilar.