Jizzax davlat pedagogika universitetida abituriyentlar uchun tashkil etilgan Call-center’ga ommaviy axborot vositalari va keng jamoatchilik vakillari uchun maxsus media tur uyushtirildi.
Jizzax davlat pedagogika universitetida 2025/2026-o‘quv yili uchun qabul jarayonlari boshlangani munosabati bilan abituriyentlar va ularning ota-onalariga ma’lumot va maslahat berish maqsadida maxsus Call-center va maslahat markazi tashkil etilgan. Joriy yilda universitet qabul komissiyasi qoshida faoliyat olib borayotgan maslahat markazida 10 nafar tajribali mutaxassis faoliyat yuritmoqda. Ular kun davomida qo‘ng‘iroqlar va yuzma-yuz savollarga asosli, rasmiy Nizom talablari asosida javob berishga tayyor. Markaz har kuni o‘rtacha 60 ga yaqin murojaatni qabul qilib, har bir abituriyent va uning ota-onasiga to‘liq tushunarli, aniq axborot yetkazishni maqsad qilgan.
Media tur doirasida jurnalistlar va jamoatchilik vakillariga Call-center faoliyati, mavjud texnik jihozlar, operatorlar ish tartibi hamda murojaatlar bilan ishlash jarayonlari haqida batafsil ma’lumotlar berildi. Ta’kidlanishicha, markaz abituriyentlar uchun qulay, ishonchli va zamonaviy axborot manbai sifatida xizmat qilmoqda.
📞 Call-center orqali quyidagi yo‘nalishlarda maslahat olish mumkin:
-
Qabul shartlari va hujjat topshirish tartibi
-
Ta’lim yo‘nalishlari va to‘lov-kontrakt miqdori
-
Imtihon jarayonlari va onlayn ariza berish bo‘yicha yo‘riqnomalar
-
Qabulga oid barcha normativ-huquqiy asoslar
Universitet rahbariyati ta’lim sifatini oshirish barobarida, qabul jarayonlarida ham ochiqlik, oshkoralik va abituriyentlarga xizmat ko‘rsatish madaniyatini yuksaltirishga alohida e’tibor qaratmoqda.
