Jizzax shahar Prezident maktabi direktori, “Mastery”o‘quv markazi hamda xususiy maktab asoschisi bo‘lgan G‘aybullayev Azizbek ishtirokida o‘tgan davra suhbatini Yoshlar masalalari, ma’naviy-ma’rifiy ishlar bo‘yicha birinchi prorektor S.I.Nazarqosimov ochib berdi.
U o‘z so‘zida “Yoshlar – kelajagimiz” jamg‘armasi, “Yoshlar ishlari agentligi” tashabbusi bilan “MFactor” hamda viloyatlar hokimliklari bilan hamkorlikda yurtimiz bo‘ylab ilk bora tashkil etilgan hamda barcha hududlar qamrab olingan “BIZNES MARAFON” kelajagini o‘z qo‘li bilan yaratish istagida bo‘lgan yoshlar uchun ayni muddao ekanligini ta’kidladi.
Ta’kidlash joiz, Respublikamizning barcha viloyat va shaharlarida o‘tkazilgan “BIZNES MARAFON” dastlabki bosqichda 30 000 ga yaqin yoshlarni oflayn, 500 000 ga yaqin yoshlarni esa onlayn qamrab olishga muvaffaq bo‘ldi. Chinakam mahorat darsiga aylangan ochiq muloqot davomida mehmon muvaffaqiyat, yaxshi natija, yutuq va omadga erishish yo‘lida nimalarga e’tibor berish lozimligi, ishtiyoq va umidni so‘ndirmaslik uchun harakatdan to‘xtamaslik kerakligi haqida maslahat va tavsiyalarni berdi.
