Jizzax davlat pedagogika universitetida bo‘lib o‘tgan ilmiy-amaliy seminarda Oliy ta’lim, fan va innovatsiyalar vazirligi huzuridagi “Bosh ilmiy-metodik markaz” rahbari Uzoqboy Begimqulov ishtirok etdi.

Seminar davomida so‘nggi uch yilda rahbar va pedagog kadrlarning uzluksiz malakasini oshirish tizimi bo‘yicha yaratilgan yangi sxema va metodik yondashuvlar bosqichma-bosqich tushuntirib berildi.

Uzoqboy Shoyimqulov (Begimqulov) o‘z taqdimotida pedagoglarning kasbiy faoliyatida mustaqil malaka oshirish shakllari, malaka oshirish kurslari jarayonida tinglovchilarning o‘zlashtirish ko‘rsatkichlari tahlillari haqida ma’lumot berdi.

Shuningdek, u o‘z nutqida bugungi kunda ta’lim mazmuni tez sur’atlarda yangilanib borayotganini, yangi ta’lim yo‘nalishlari paydo bo‘layotganini ta’kidlab, har bir pedagog o‘z ustida tinimsiz izlanish, zamon talabiga mos ravishda rivojlanish zarurligini qayd etdi.

“O‘qituvchi sifatli ta’lim berishi bilan birga, ilmiy tadqiqot ishlari bilan ham shug‘ullanishi lozim. Bu — ta’limning ikki qanoti”, — dedi Uzoqboy Begimqulov. Tadbir doirasida uzluksiz malaka oshirish sohasiga oid yangi elektron platforma taqdimoti ham o‘tkazildi. Ushbu tizim ma’lumotlar bazasi va qulay interfeysi bilan qatnashchilarda katta qiziqish uyg‘otdi.

Seminar yakunlarida universitet rektori Maqsudjon Yuldashev ta’lim muassasasida olib borilayotgan islohotlar va yangiliklar haqida to‘xtalib, har haftaning shanba kunlari tashkil etilayotgan “ijtimoiy faollik kunlari” doirasida hamkorlikda seminarlar o‘tkazish tashabbusini ilgari surdi.