Bugun Jizzax davlat pedagogika universiteti madaniyat saroyida oliygoh rektori Maqsudjon Yuldashev tomonidan universitetni rivojlantirish konsepsiyasining taqdimoti bo‘lib o‘tdi. Unda professor-o‘qituvchilar, fakultet dekanlari va bo‘lim boshliqlari ishtirok etdilar.

Taqdimot davomida rektor universitetning yaqin va uzoq istiqboldagi asosiy yo‘nalishlari, ustuvor vazifalari hamda amalga oshirilishi rejalashtirilgan islohotlar haqida atroflicha so‘z yuritdi.

Xususan, ta’lim sifatini oshirish, ilmiy-tadqiqot ishlarini yanada jadallashtirish, xalqaro hamkorlikni kengaytirish, talabalar uchun qulay va zamonaviy shart-sharoitlar yaratish, infratuzilmani rivojlantirish kabi masalalar konsepsiyaning asosiy ustuvor yo‘nalishlari sifatida belgilandi.

Shuningdek, professor-o‘qituvchilar ta’lim jarayonini takomillashtirish, sog‘lom ma’naviy muhitni shakllantirish, raqamli texnologiyalarni keng joriy etish, yoshlarni ilm-fan va innovatsiyaga jalb qilish yuzasidan o‘z taklif va fikr-mulohazalarini bayon etdilar.

Tadbirda, shu bilan birga, universitetga tayinlangan yangi prorektorlar ham e’lon qilindi.

Yig‘ilish yakunida rektor Maqsudjon Yuldashev barchani universitet taraqqiyoti yo‘lida birdek mas’uliyatli bo‘lishga, belgilangan maqsad va vazifalarni amalga oshirishda faol ishtirok etishga chaqirar ekan, shunday dedi:

“Universitet kelajagi — bu jamoaviy mehnat samarasi. Har bir o‘qituvchi, har bir xodim o‘z hissasini qo‘shishi zarur. Birgalikda biz uni yangi marralarga olib chiqamiz.”