Xabaringiz bor joriy yilning may oyidan boshlab Professional taʼlim muassasalarida bosqichma-bosqich xorijiy tillarga o‘qitish bo‘yicha maxsus kurslar tashkil etilmoqda.
Xususan, A.Qodiriy nomidagi Jizzax davlat pedagogika universiteti qoshidagi G‘allaorol xizmat ko‘rsatish va servis texnikumida xorijiy til o‘rganish istagida bo‘lgan talabgorlarni saralash orqali, ingliz tilini o‘qitish yo‘lga qo‘yildi.Ayni paytda ushbu kurslarda 20 ga yaqin xorijiy tilni o‘rganish istagida bo‘lgan yoshlar universitetning malakali pedagoglari yordamida mashg‘ulotlar o‘tishmoqda.
-Bugungi kunda kompyuter tarjimonlar, turli dasturlar va ovozni aniqlash texnologiyalaridagi rivojlanish sharofati bilan xorijiy tillarni o‘rganish imkoniyati yanada kengaymoqda. Mamlakatimizning har bir burchagida qator til markazlari faoliyat olib bormoqda. Jumladan, oliy taʼlim muassasalari qoshida ham xorijiy tillarni o‘rganishga qaratilgan markazlar ham yoshlar xizmatiga shaydir. Bu esa yoshlarimizning xorij tillarini puxta o‘rganish, o‘z sohasiga oid xalqaro tajribalarni egallash imkoniyatlarini kengaytiradi. Guruhimizdagi o‘quvchilarning ingliz tiliga bo‘lgan ishtiyoqi baland, ularnig orzulari esa undan-da baland..ular faqatgina ingliz tilini o‘rganish bilan cheklanib qolmoqchi emas. Maxsus sertifikatga ega bo‘lishgach nemis tilini ham o‘rganishni niyat qilishmoqda- deydi guruh rahbari Avaz Mirzaev
Bugun bir nechta xorijiy tillarni egallab, turli sohalardagi xalqaro tajribalarni o‘rganayotgan, amaliyotga tatbiq etayotgan, qator yutuqlarga erishayotgan yoshlar safi anchagina. Ularning eng katta yutug‘i ham xorijiy tillarni puxta bilishi bilan baholanadi. Chunki har bir tilni o‘rganishimiz bilan biz yangi bilimlarga ega bo‘lamiz, imkoniyatlarimiz kengayadi. Ajab emas G‘allaorol xizmat ko‘rsatish va servis texnikumida xorijiy til kurslariga qatnayotgan tinglovchilar orasidan ham ana shunday chet tillarda biyron so‘zlashuvchi yoshlar yetishib chiqsa.
